নিউজ ডেস্ক, ২৪ ফেব্ৰুৱাৰী : বিলকিছ বানু গোচৰৰ দোষী ৰমেশ চন্দনাক পেৰোল প্ৰদান । গুজৰাট উচ্চ ন্যায়ালয়ে শুকুৰবাৰে ৫ মাৰ্চত হ'বলগীয়া তেওঁৰ ভাগিনীয়েকৰ বিয়াত উপস্থিত থাকিবলৈ ১০ দিনৰ পেৰোল মঞ্জুৰ কৰে ।
বিগত সপ্তাহত পেৰোলৰ বাবে উচ্চ ন্যায়ালয়ত আবেদন কৰা চন্দনা হৈছে উচ্চতম ন্যায়ালয়ৰ নিৰ্দেশৰ পিছত ২১ জানুৱাৰীত গোধৰা চহৰৰ এখন কাৰাগাৰত আত্মসমৰ্পণ কৰাৰ পিছত পেৰোল প্ৰদান কৰা গোচৰটোৰ দ্বিতীয়জন দোষী । তেওঁলোকক ২০০২ চনৰ গোধৰা সংঘৰ্ষৰ সময়ত বিলকিছ বানুৰ দলবদ্ধ ধৰ্ষণ আৰু তেওঁৰ পৰিয়ালৰ সাতজন সদস্যৰ হত্যাৰ গোচৰত দোষী সাব্যস্ত কৰা হৈছিল ।
"এই আবেদনৰ দ্বাৰা দোষী-আবেদনকাৰীয়ে তেওঁৰ ভগ্নীৰ পুত্ৰৰ বিবাহ অনুষ্ঠানত উপস্থিত থাকিবলৈ পেৰোল ছুটীৰ বাবে প্ৰাৰ্থনা কৰে । আবেদনত উল্লেখ কৰা ভিত্তিবোৰ বিবেচনা কৰি আবেদনকাৰী-অভিযুক্তক দহ দিনৰ বাবে পেৰোল ছুটীত মুকলি কৰাৰ নিৰ্দেশ দিয়া হৈছে ।" শুকুৰবাৰে জাৰি কৰা আদেশত ন্যায়াধীশ দিব্যেশ যোশীয়ে কয় ।
উল্লেখ্য যে উচ্চতম ন্যায়ালয়ত দাখিল কৰা গুজৰাট চৰকাৰৰ শপতনামা অনুসৰি, চন্দনাই 2008 চনত কাৰাবাস খটাৰ পিছত 1,198 দিনৰ বাবে পেৰোল আৰু 378 দিনৰ ফাৰ্লো উপভোগ কৰিছে । ইয়াৰ পূৰ্বে উচ্চ ন্যায়ালয়ে পেৰোল আবেদনত অনুমতি প্ৰদান কৰি গোচৰটোৰ আন এজন দোষী প্ৰদীপ মোধিয়াক ৭-১১ ফেব্ৰুৱাৰীলৈ গোধৰা কাৰাগাৰৰ পৰা মুকলি কৰি দিয়ে ।
২০২২ চনৰ আগষ্ট মাহত কাৰাবাসৰ সময়ত তেওঁলোকৰ 'ভাল আচৰণ'ৰ কথা উল্লেখ কৰি ৰাজ্য চৰকাৰে ১৯৯২ চনৰ নীতি অনুসৰি তেওঁলোকৰ ৰেহাইৰ আবেদন গ্ৰহণ কৰে আৰু যাৱজ্জীৱন কাৰাদণ্ড ভোগ কৰা ১১ জন দোষীক কাৰাগাৰৰ পৰা আগতীয়াকৈ মুকলি কৰি দিয়ে ।
আনহাতে, উচ্চতম ন্যায়ালয়ে ৮ জানুৱাৰীত ১১ জন দোষীৰ আটাইকেইজনকে মুকলি কৰি দিয়াটো ৰদ কৰে আৰু উল্লেখ কৰে যে ৰাজ্য চৰকাৰৰ দোষীসকলক আগতীয়াকৈ মুকলি কৰি দিয়াৰ অধিকাৰ নাই । কিয়নো ২০০২ চনৰ গোচৰটোৰ বিচাৰ মহাৰাষ্ট্ৰত অনুষ্ঠিত হৈছিল ।
ইয়াৰ পিছত উচ্চতম ন্যায়ালয়ে ১৪ বছৰ কাৰাগাৰত থকাৰ পিছত ২০২২ চনৰ স্বাধীনতা দিৱসত গোধৰা জিলা কাৰাগাৰৰ পৰা মুকলি হোৱা দোষীসকলক দুসপ্তাহৰ ভিতৰত কাৰাগাৰলৈ উভতি যাবলৈ নিৰ্দেশ দিয়ে । তেওঁলোকে ২১ জানুৱাৰীত গোধৰা কাৰাগাৰ কৰ্তৃপক্ষৰ সন্মুখত আত্মসমৰ্পণ কৰে ।
লগতে পঢ়ক :পাৰাদ্বীপত বিতৰ্কিত জাহাজ গ্ৰেপ্তাৰৰ নিৰ্দেশ ওড়িশা উচ্চ ন্যায়ালয়ৰ
