তেজপুৰ, 30 মে' : সাগৰীয় ঘূৰ্ণি ৰেমলৰ প্ৰাদুৰ্ভাৱ উত্তৰ-পূৰ্বাঞ্চলৰ ৰাজ্যকেইখনত ভয়াৱহভাৱে পৰিছে ৷ ৰেমলৰ পিচতে মণিপুৰৰ কেবাখনো জিলাত হোৱা ধাৰাসাৰ বৰষুণৰ ফলত ভয়ানক ভূমিস্খলন আৰু বানৰ সৃষ্টি হয় ৷ পাহাৰীয়া ৰাজ্যখনৰ চুৰাচান্দপুৰ চিনাঙপি, 2 নং ৰাষ্ট্ৰীয় ঘাইপথত ভূমিস্খলনৰ ফলত পথ যোগাযোগ বিচ্ছিন্ন হোৱাৰ লগতে বহু লোকৰ ঘৰ পানীত বুৰ গৈছে ৷ দীৰ্ঘদিনে ৰাজ্যখন বিচ্ছিন্নতাবাদী গোষ্ঠীগত সংঘৰ্ষত জৰ্জৰিত হোৱাৰ পিচত এইবাৰ ভয়ানক বান আৰু ভূমিস্খলনৰ ফলত স্বাভাৱিক জীৱনযাত্ৰাত ব্যাঘাত জন্মিছে ৷
এই পৰিস্থিতিত অসম ৰাইফলছে বানৰ কবলত থকা লোকসকলক উদ্ধাৰ কৰি নিৰাপদ স্থানত সংস্থাপন দিয়ে ৷ অসম ৰাইফলছে নাৱৰ জৰিয়তে শিশু-বৃদ্ধ সকলোকে উদ্ধাৰ কৰিছে আৰু তেওঁলোকক অস্থায়ী শিবিৰত সংস্থাপন দিয়াৰ ব্যৱস্থা কৰিছে ৷ ভুক্তভোগী লোকসকলক চাউল, দালি, আটা ইত্যাদি খাদ্য সামগ্ৰী যোগান ধৰিছে ৷
অসম ৰাইফালছৰ মুখপাত্ৰ লে. কৰ্ণেল ৰোহন মহাজনে সংবাদ মাধ্যমলৈ প্ৰেৰণ কৰা এক বিবৃতিত কয় যে অসম ৰাইফলছে 75 গৰাকী শিশুক উদ্ধাৰ কৰি তেওঁলোকক সাহাৰ্য প্ৰদান কৰে ৷
আনহাতে অসম ৰাইফলছে বৃহস্পতিবাৰে চাণ্ডেল জিলাৰ প্ৰাচ্য শিশুগৃহ, অনাথ আশ্ৰম বিদ্যালয়ৰ শিশুসকলক সাহাৰ্য সামগ্ৰী আৰু অত্যাৱশ্যকীয় সামগ্ৰী বিতৰণ কৰে ৷ এই সাহাৰ্যৰ পৰা মুঠ 75 টা শিশুৱে সকাহ লাভ কৰিব বুলি মহাজনে উল্লেখ কৰে ৷
শিশুগৃহ কৰ্তৃপক্ষই এই প্ৰচেষ্টাৰ বাবে অসম ৰাইফলছৰ প্ৰতি শলাগ লৈ আন্তৰিক কৃতজ্ঞতা প্ৰকাশ কৰে ৷ ইফালে মণিপুৰৰ কেবাখনো জিলাত বিশেষকৈ ইম্ফলৰ বিভিন্ন স্থানত পথ যোগাযোগ ব্যৱস্থা ব্যাহত হৈছে ৷ বহুতো পথ ভূমিস্খলনৰ ফলত বন্ধ হৈ পৰিছে ৷ এই পথসমূহ অসম ৰাইফলছে মুকলি কৰি দিছে বুলি জানিব পৰা গৈছে ৷
লগতে পঢ়ক : উমৰাংচুত যিকোনো মুহূৰ্তত ছিগিব পাৰে মথাউৰি - Dima Hasao Floods
