میرٹھ: پیرا اولمپک میں میڈل جیتنے والے کھلاڑیوں کیلئے اعزازی تقریب کا اہتمام

کھیل کے میدان میں میرٹھ سے بہت سے کھلاڑیوں نے ملک کا نام روشن کیا ہے۔ حکومت یہاں کے کھلاڑیوں کے لیے کھیل یونیورسٹی قائم کریں تو یہاں کے کھلاڑی بھی ملک کے لیے اور اولمپک میں زیادہ میڈل حاصل کر بھارت کا نام روشن کر سکتے ہیں۔

ٹوکیو اولمپکس کے جیولن تھرو مقابلے میں نیرج چوپڑا کے گولڈ میڈل حاصل کرنے کے بعد پیرا اولمپک کھیلوں میں بھی بھارتی کھلاڑیوں نے بہترین کارکردگی کا مظاہرہ کرتے میڈل حاصل کیے۔

ٹوکیو پیرا اولمپکس کھیل میں میڈل حاصل کرنے والے ایسے ہی تین کھلاڑیوں کا میرٹھ کے ڈی اے وی اسکول میں استقبال کیا گیا۔ اس موقع پر ان کھلاڑیوں نے طلبا کے ساتھ اپنی کامیابی کے تجربات شیئر کیے۔

ٹوکیو پیرا اولمپک میں جیولن کے الگ الگ مقابلوں میں ملک کی نمائندگی کرنے والے تین پیرا اولمپک کھلاڑیوں کے اعزاز میں اس تقریب کا انعقاد کیا گیا۔ اس موقع پر کھلاڑیوں نے اپنے تجربات کی روشنی میں نئی نسل کو حوصلے ہمّت اور محنت سے آگے بڑھنے کی بات کہی۔

اس کے علاوہ ان کھلاڑیوں کے کوچ نے حکومت سے میرٹھ میں کھیل یونیورسٹی قائم کرنے کی اپیل کی۔ انہوں نے کہا کہ اگر حکومت ایسا کوئی ادارہ قائم کرتی ہے تو یہاں کے کھلاڑی اولمپک میں اور زیادہ میڈل حاصل کر کے بھارت کا نام روشن کر سکتے ہیں۔

پیرا اولمپک کھلاڑیوں کے اعزاز میں میرٹھ میں منعقدہ تقریب میں شریک ہوئے ان معذور کھلاڑیوں کی حوصلہ افزائی سے ایک بات تو صاف ہے کہ ایسے بہت سے کھلاڑی بھی ہیں جو سہولیات نہ ملنے کی وجہ سے اپنے ہنر اور کھیل کو پیچھے چھوڑ دیتے ہیں۔ ضرورت ہے کہ ایسے کھلاڑیوں کی حوصلہ افزائی کی جائے۔