اجمیر: پٹرول، ڈیزل کی قیمتوں میں اضافے کے خلاف احتجاج

پٹرول ڈیزل کے دام میں اضافہ کے خلاف اجمیر شریف ضلع کلکٹریٹ پر احتجاج کیا گیا، جس میں وزیر اعظم نریندر مودی کا پتلا بھی نذر آتش کیا گیا۔

راجستھان کانگریس اقلیتی تنظیم کی جانب سے پیٹرول ڈیزل کے قیمتوں میں اضافہ کے خلاف مظاہرہ کیا گیا جس میں اجمیر شہر ضلع کانگریس اور اقلیتی تنظیم کے رہنما و کارکنان شامل تھے۔

مظاہرین کا الزام ہے کہ مرکزی حکومت غریب طبقہ کے خلاف ہے اور اس کی غلط سیاست کی وجہ سے عوام کو دشواری پیش آ رہی ہے۔

انہوں نے مطالبہ کیا کہ جس طرح عالمی سطح پر پیٹرول ڈیزل کے داموں میں کمی ہوئی ہے، یہاں بھی قیمتوں میں کمی کی جائے۔

غور طلب ہے کہ ڈیزل کی قیمت پیٹرول سے بھی زیادہ ہے۔ ایک طرف جہاں دہلی میں پیٹرول 79 روپے 76 پیسے تو وہیں ڈیزل کے داموں میں 12 پیسے اضافہ ہوا ہے، راجستھان کے کئی شہروں میں پیٹرول کے داموں میں کمی بیشی بھی دیکھی جا رہی ہے۔