نئی دہلی: وزیر اعظم نریندر مودی جمعرات کو روزگار میلے میں ویڈیو کانفرنس کے ذریعے 51 ہزار سے زیادہ نئے بھرتی کئے گئے ملازمین کو تقرر نامے تقسیم کریں گے۔ وزیراعظم نئے بھرتی ہونے والے ملازمین سے خطاب بھی کریں گے۔ روزگار میلہ پورے ملک میں 37 مقامات پر منعقد کیا جائے گا۔ اس پہل کے تحت مرکزی حکومت کے محکموں کے ساتھ ساتھ ریاستی حکومتوں / مرکز کے زیر انتظام علاقوں میں مختلف مقامات پر ملازمین بھرتی کئے جارہے ہیں۔
نئے بھرتی کردہ پورے ملک سے منتخب یہ افراد مختلف وزارتوں / محکموں بشمول ریونیو کا محکمہ ، امور داخلہ کی وزارت ، اعلیٰ تعلیم کا محکمہ، اسکولی تعلیم اور خواندگی کا محکمہ، مالی خدمات کا محکمہ، وزارت دفاع، صحت اور خاندانی بہبود کی وزارت اور محنت اور روز گار کی وزارت میں سرکاری ملازمتیں جوائن کریں گے۔ روز گار میلہ روزگار پیدا کرنے کو اعلیٰ ترین ترجیح دینے کے وزیراعظم کے وعدے کو پورا کرنے کی جانب ایک قدم ہے۔ امید ہے کہ روز گار میلہ، روزگار پیدا کرنے میں اضافہ کرنے کے علاوہ نوجوانوں کو بامعنی امداد فراہم کرے گا اور انہیں ملک کی ترقی میں شرکت کے لئے با اختیار بنائے گا۔