Delhi MCD Election ایم سی ڈی انتخابات میں مسلمانوں نے کانگریس پر بھروسہ کیا

قومی دارالحکومت دہلی میں کارپوریشن انتخابات کے نتائج میں جہاں عام آدمی پارٹی کے بیشتر امیدواروں نے کامیابی حاصل کی ہے وہیں مسلم اکثریتی علاقوں میں کانگریس کے امیدوار کامیاب ہوئے ہیں۔ Muslim Vote for Congress in Delhi MCD Election

دہلی:دارالحکومت دہلی میں مسلم اکثریتی علاقوں میں پرانی دہلی کے علاوہ تمام سیٹوں پر عام آدمی پارٹی کو شکست کا سامنا کرنا پڑا، چاہے وہ اوکھلا کی ابوالفضل اور ذاکر نگر کی سیٹ ہو یا پھر شمال مشرقی دہلی کی سیلم پور حلقہ اسمبلی سے چوہان بانگر اور کبیر نگر کا علاقہ، ان تمام سیٹوں پر کانگریس نے کامیابی حاصل کی ہے جبکہ پرانی دہلی کے جامع مسجد، سیتارام بازار، چاندنی محل بلی ماران اور قریش نگر وارڈ سے عام آدمی پارٹی کے امیدواروں نے کامیابی حاصل کی ہے۔ Delhi Muslims Prefer Congress Over AAP

واضح رہے کہ شمال مشرقی دہلی میں ہوئے فرقہ وارانہ فسادات کے بعد سے ہی مسلم علاقوں میں کیجریوال حکومت کے خلاف ناراضگی تھی۔ انتخابات میں بھی شمال مشرقی دہلی کے عوام نے حق رائے دہی کا استعمال کرتے ہوئے کیجریوال حکومت کو یہ بتایا ہے کہ 'اگر کیجریوال کو مسلمانوں کے ووٹوں کی ضرورت نہیں تو انہیں بھی عام آدمی پارٹی سے کوئی سروکار نہیں ہے۔

اس دوران یہ واضح ہوگیا کہ مسلمانوں نے ایک بار پھر سے کانگریس کے امیدواروں پر اپنا بھروسہ جتایا ہے حالانکہ اسد الدین اویسی کی سیاسی جماعت اے آئی ایم آئی ایم ایک بار پھر مسلمانوں کا ووٹ اپنی طرف کھینچ پانے میں ناکام رہی ہے۔