رامبن: ضلع اسپتال میں ڈائیلسز یونٹ کا افتتاح

ذرائع کے مطابق وزیر اعظم نیشنل ڈائیلسز پروگرام کے تحت ضلع اسپتال رامبن میں آج یہاں پہلی ڈائیلسز یونٹ کا قیام عمل میں لایا گیا۔ اس دوران ڈائیلسز یونٹ کی افتتاحی تقریب کے دوران سی ایم او رامبن ڈاکٹر فرید اور میڈیکل سپرنٹینڈنٹ ڈاکٹرعبدالحمید ذرگر کی موجودگی میں رام بن گاندھری سے تعلق رکھنے والی 56 سالہ مریم بیگم نے افتتاح تقریب انجام دی۔

افتتاح کے فورا بعد ہی مریم بیگم ڈائیلسز کے مرحلہ گذریں۔ اس طرح وہ رام بن ہسپتال میں گردے کا پہلی مریضہ ہے جس کی ڈائیلسز کرائی گئی۔

اس موقع پر سی ایم او نے خطاب کرتے ہوئے کہا کہ ایڈیشنل چیف سکرٹیری صحت اور میڈیکل ایجوکیشن ڈیپارٹمنٹ اٹل دلو کی ہدایت پر یہ قدم اٹھایا گیا ہے۔

انہوں نے کہا کہ ضلع اسپتال رامبن میں ڈائیلسز یونٹ کی علاقے کے لوگوں کو طویل عرصے سے ضرورت محسوس تھی۔ جسے آج پورا کیا گیا۔

انہوں نے کہا کہ اس سے ایسے مریضوں کو بہت مدد ملے گی جنہیں علاج کے لئے جموں یا سرینگر جانا پڑتا ہے ۔جس میں بہت زیادہ رقم اور وقت خرچ ہوتا ہے ۔

انہوں نے مزید کہا کہ یہ ڈائیلسز یونٹ تقریبا 25.45 لاکھ کی لاگت سے تیار ہوا ہے اور اس میں جے کے ایم ایس سی ایل (جے اینڈ کے میڈیکل سپلائی کارپوریشن لمیٹڈ) کے ذریعہ فراہم کردہ 5 ڈائیلسز مشینیں ہیں۔ جن میں سے 1 مشین ہیپاٹائٹس اور ایچ آئی وی مریضوں کے لئے مخصوص رکھی گئی ہے۔ کسی بھی ہنگامی صورتحال کی صورت میں اسے استعمال میں لایا جائے گا ۔