مالیگاؤں: سرکار کلاں عیدگاہ پر اسی سال سے نماز عید الفطر کا اہتمام ہوگا

ریاست مہاراشٹر کے معروف شہر مالیگاؤں کے جنوب مغربی حصے میں کثیر مسلم آبادی کے درمیان عامتہ المسلمین کے لیے وقف کردہ تین ایکڑ قطعہ اراضی پر عید گاہ کا سنگ بنیاد الشیخ سید محمد محمود اشرف میاں اشرفی الجیلانی (سجادہ نشین خانقاہ اشرفیہ حسینیہ سرکار کلاں کچھوچھہ شریف) کے ہاتھوں گزشتہ روز رکھا گیا ہے اور اس عیدگاہ کی تعمیر کے لیے کارروائی بھی شروع کردی گئی ہے۔

عید گاہ پر اسی سال رمضان المبارک کے اختتام پر نماز عیدالفطر ادا کی جائے گی۔ یہاں نماز کیلئے ممبر اور مصلیٰ کا کام جاری ہے۔ اسی طرح صاف صفائی اور زمین لیول کی جارہی ہے اور دیگر بنیادی سہولیات کے لیے عیدگاہ کے ذمہ داران نے سابق رکن اسمبلی آصف شیخ کی مدد اور رہنمائی طلب کی تاکہ جلد ہی عیدگاہ عبادت کے لیے شروع کردی جائے اور عامتہ المسلمین کو آنے جانے کے لیے آسانی ہو اس لئے ایک چھوٹے پل کی تجویز بھی دی ہے۔

اس تعلق سے عیدگاہ کے ذمہ دار محمد عارف (اسٹیمپ وائنڈر) نے بتایا کہ انہوں نے مونسپل کارپوریشن میئر طاہرہ شیخ اور سابق میئر شیخ رشید کے علاوہ میونسپل کمشنر سے یہ مطالبہ کیا تھا کہ وقف کردہ زمین پر تعمیر ہورہی عیدگاہ پر آنے جانے کے لیے راستہ، پانی کا نظم، وال کمپاؤنڈ وغیرہ کی سہولیات فراہم کی جائیں۔ اس سلسلے میں آج ایک نمائندہ وفد نے شیخ آصف کی قیادت میں عیدگاہ کا دورہ کیا اور یہاں کارپوریشن کے انجینئرز کی ٹیم اور دیگر سرکردہ افراد موجود تھے۔

اس ضمن میں شیخ آصف نے وہاں موجود کارپوریشن کے انجینئرز کو بتایا کہ جھانجیشور مندر کے بازو سے ڈپی روڈ سے متصل موسم ندی پر ایک منی بریج تعمیر کی جائے جس کی سائز اور درکار ضروری جگہ کا معائنہ کر کے تعمیر کیا جائے۔

انہوں نے کہا کہ شیخ رشید کی ہدایات پر کارپوریشن عملہ کے ساتھ انہوں نے عیدگاہ کا دورہ کیا اور جلد ہی تمام سہولیات فراہم کرنے کا یقین دلایا۔