نئی دہلی: کانگریس کے سابق صدر راہل گاندھی نے وزیر اعظم نریندر مودی کو خط لکھتے ہوئے کہا ہے کہ کشمیری پنڈتوں کے ایک وفد نے انہیں بتایا ہے کہ حکام انہیں تحفظ فراہم کیے بغیر وادی میں واپس جانے کے لیے کہہ رہے ہیں، جس سے انہیں اپنی زندگی کے خطرے کا اندیشہ پیدا ہو گیا ہے۔ راہل گاندھی نے اپنے خط میں کہا کہ انہوں نے وفد کو یقین دلایا ہے کہ وہ ان کا نقطہ نظر وزیر اعطم مودی تک پہنچائیں گے اور انہیں درپیش عملی مشکلات کو دور کرنے پر زور دیں گے۔
انہوں نے خط کے اقتباسات بھی ٹویٹ کیے اور کہاکہ 'وزیراعظم کشمیری پنڈتوں کے ایک وفد نے بھارت جوڑو یاترا کے دوران مجھ سے ملاقات کی اور مجھے اپنی دکھ بھری حالت بتائی۔' دہشت گردوں کی ٹارگٹ کلنگ کا نشانہ بننے والے کشمیری پنڈتوں کو وادی جانے پر مجبور کیا گیا۔ حفاظتی ضمانتوں کے بغیر یہ ایک ظالمانہ اقدام ہے۔ امید ہے کہ آپ اس معاملے میں مناسب قدم اٹھائیں گے۔