తొలి వన్డేలో టీమ్ఇండియా ఆల్​రౌండ్ ప్రదర్శన- చిత్తుగా ఓడిన సఫారీలు

Ind Vs Sa 1st ODI 2023 : సౌతాఫ్రికా పర్యటనలో తొలి వన్డేలో టీమ్ఇండియా 8 వికెట్ల తేడాతో నెగ్గింది. దీంతో మూడు మ్యాచ్​ల సిరీస్​లో భారత్ 1-0 ఆధిక్యంలోకి దూసుకెళ్లింది.​

Ind Vs Sa 1st ODI 2023 :సౌతాఫ్రికా పర్యటనలో మూడు మ్యాచ్​ల వన్డే సిరీస్​ను భారత్ ఘనంగా ఆరంభించింది. ఆదివారం జరిగిన తొలి వన్డేలో 8 వికెట్ల తేడాతో నెగ్గింది. సఫారీ జట్టు నిర్దేశించిన 117 పరుగుల స్వల్ప లక్ష్యాన్ని 2 వికెట్లు కోల్పోయి 16.4 ఓవర్లలో ఛేదించింది. ఓపెనర్ అరంగేట్ర బ్యాటర్ సాయి సుదర్శన్ (55), శ్రేయస్ అయ్యర్ (52) హాఫ్ సెంచరీలతో అదరగొట్టారు. సౌతాఫ్రికా బౌలర్లలో వియాన్ మల్డర్, ఫెలుక్వాయో తలో వికెట్ దక్కించుకున్నారు. 5 వికెట్లతో సఫారీలను శాసించిన పేసర్ అర్షదీప్​ సింగ్​కు 'మ్యాన్ ఆఫ్ ది మ్యాచ్ అవార్డు' లభించింది. ఈ విజయంతో వన్డే సిరీస్​లో భారత్ 1-0 ఆధిక్యంలోకి దూసుకెళ్లింది. కాగా, ఇరుజట్ల మధ్య రెండో వన్డే డిసెంబర్ 19న జరగనుంది.

చిన్న టార్గెట్​ను ఛేదించే క్రమంలో డాషింగ్ ఓపెనర్ రుతురాజ్ గైక్వాడ్ (5) స్వస్ప స్కోర్​కే వెనుదిరిగాడు. అతడ్ని 3.4 ఓవర్ వద్ద వియాన్ మల్డర్ ఎల్​బీడబ్ల్యూగా పెవిలియన్ చేర్చాడు. ఇక వన్​డౌన్​లో వచ్చిన అయ్యర్ సౌతాఫ్రికా బౌలర్లకు ఛాన్స్ ఇవ్వలేదు. అతడు సుదర్శన్​లో కలిసి 88 పరుగుల భాగస్వామ్యం నెలకొల్పాడు. టీమ్ఇండియాను విజయం అంచుల దాకా తీసుకొచ్చి అయ్యర్, ఫెలుక్వాయో బౌలింగ్​లో క్యాచౌట్​గా క్రీజును వీడాడు. అయ్యర్ ఔట్​తో క్రీజులోకి వచ్చిన తిలక్ వర్మ (1*) సింగిల్ తీసి విజయం ఖరారు చేశాడు.

అంతకుముందు టాస్ నెగ్గి బ్యాటింగ్ చేసిన సౌతాఫ్రికా 27.​3 ఓవర్లలో 116 పరుగులకే ఆలౌటైంది. టీమ్ఇండియా పేసర్ల దెబ్బకు సఫారీలు విలవిల్లాడిపోయారు. యంగ్ పేసర్లు అర్షదీప్ సింగ్ 5, ఆవేశ్ ఖాన్ 4 వికెట్లతో సఫారీ గడ్డపై నిప్పులు చెరిగారు. ఓపెనర్ రీజా హెండ్రిక్స్ (0), రస్సీ వాన్​ డర్​ డస్సెన్​ (0), టోని డి జోర్జీ (28), హెన్రిచ్ క్లాసెన్ (6), ఎయిడెన్ మర్​క్రమ్ (12), వియాన్ ముల్దార్ (0), డేవిడ్ మిల్లర్ (2) ఎవరూ పెద్దగా ప్రభావం చూపలేకపోయారు. ఆఖర్లో ఫెలుక్వాయో (33) కాసేపు ఒంటరి పోరాటం చేయడం వల్ల సౌతాఫ్రికా స్కోర్ 100 పరుగులు దాటింది.