'వీరసింహారెడ్డి' షూట్ తర్వాత నటసింహం బాలకృష్ణ మరో ప్రాజెక్ట్కు సిద్ధమయ్యారట. ఈ క్రమంలో 'బింబిసార' డైరెక్టర్కు ఆ మూవీ బాధ్యతలు అప్పజెప్పారట. ఇంతకీ ఆయన ఎవరంటే?
కొత్త ప్రాజెక్టుల విషయంలో బాలకృష్ణ జోరు కొనసాగుతోంది. ఒక సినిమా చేస్తుండగానే, మరో చిత్రాన్ని సెట్స్‌పైకి తీసుకెళుతున్నారు. సంక్రాంతికి 'వీరసింహారెడ్డి'తో సందడి చేయనున్న ఆయన, ఇప్పటికే అనిల్‌ రావిపూడి దర్శకత్వం వహిస్తున్న సినిమాని పట్టాలెక్కించారు. ఓ షెడ్యూల్‌ చిత్రీకరణ కూడా పూర్తయింది. తదుపరి ఆయన చేయాల్సిన సినిమాల జాబితా కూడా కాస్త పెద్దగానే కనిపిస్తోంది.
దీనికితోడు ఎప్పటికప్పుడు తనకున్న కొత్త ఆసక్తుల్ని కూడా బయటపెడుతున్నారు బాలకృష్ణ. 'వీరసింహారెడ్డి' వేడుకలో చెంఘీజ్‌ఖాన్‌ కథతో సినిమా చేయాలనుందని చెప్పిన సంగతి తెలిసిందే. ఈ దశలోనే ఓ కొత్త ప్రాజెక్ట్ తెరపైకొచ్చింది. 'బింబిసార'తో విజయాన్ని అందుకున్న యువ దర్శకుడు వశిష్ఠ్‌ తన తదుపరి చిత్రాన్ని బాలకృష్ణతో తెరకెక్కించనున్నట్టు తెలుస్తోంది. ఇప్పటికే కథ విన్న బాలకృష్ణ తన అంగీకారం తెలిపారని సమాచారం. 'బింబిసార' సోషియో ఫాంటసీ చిత్రంగా రూపొందింది. బాలకృష్ణతోనూ వశిష్ఠ్‌ ఓ కొత్త రకమైన సినిమాని తెరకెక్కించే ప్రయత్నం చేస్తున్నట్టు తెలిసింది.