‘తెలిసో తెలియక గంజాయి పండించుకుంటున్నాం.. గంజాయి వ్యాపారం మాత్రం చేయడం లేదు. మేము పండించే సరకు వివిధ రాష్ట్రాల వారు తీసుకెళ్లి పోలీసులకు పట్టుబడితే మా పేర్లు చెబుతుండటంతో మాపై కేసులు నమోదు చేస్తున్నారు. అందువల్ల ఇకపై గంజాయి సాగు చేపట్టబోమని గుమ్మిరేవుల పంచాయతీ గిరిజనుల తీర్మానం చేశారు.
గూడెంకొత్తవీధి మండలంలోని ధారకొండ, గుమ్మిరేవుల పంచాయతీల నుంచి కొనుగోలు చేసిన గంజాయి ఇటీవల కాలంలో పలు ప్రాంతాల్లో పట్టుబడింది. తాజాగా పోలీసులు రైతులపై కేసులు నమోదు చేస్తుండటంతో దీనిపై ఆందోళన చెందిన గుమ్మిరేవుల పంచాయతీలోని 12 గ్రామాల గిరిజనులు.. సోమవారం సమావేశమై ఇకపై ఈ సాగు చేపట్టకూడదని నిర్ణయించుకున్నారు. వరి, ఇతర వాణిజ్య పంటలు పండించేందుకు ప్రభుత్వం తమకు నాణ్యమైన విత్తనాలు అందించాలని... పంటలకు గిట్టుబాటు ధరలు కల్పించాలని రైతులు డిమాండ్‌ చేశారు. సర్పంచి నైని కమలమ్మ అధ్యక్షతన జరిగిన ఈ సమావేశంలో సీపీఐ నేత ఎస్‌.విష్ణుమూర్తి, ఉప సర్పంచి జోరంగి వెంకటరావు తదితరులు పాల్గొన్నారు.
ఇదీ చదవండి:vishaka steel protest: 250వ రోజు ఉక్కు ఉద్యమం.. 25 గంటల నిరవధిక దీక్ష చేపట్టిన కార్మికులు