ఆడశిశువు పుట్టిందన్న కారణతో ఓ తల్లి కన్న పేగు బంధాన్ని మరిచింది. పాపను ఆస్పత్రిలోనే వదిలేసి.. గుట్టుచప్పుడు కాకుండా అక్కడినుంచి వెళ్లిపోయింది. ఈ దారుణ ఘటన నంద్యాల జిల్లా డోన్లో చోటుచేసుకుంది. ఏడు రోజుల క్రితం పురిటి నొప్పులతో డోన్లోని యశోదా ఆసుపత్రికి వచ్చిన ఓ గర్భిణీ.. ఆడ బిడ్డకు జన్మనిచ్చింది. అనంతరం ఆ శిశువును అక్కడే వదిలేసి తల్లి, బంధువులు వెళ్లిపోయారు. ఎంతసేపటికీ శిశువు కోసం ఎవ్వరూ రాకపోవడంతో ఆసుపత్రి యాజమాన్యం పోలీసులకు ఫిర్యాదు చేసింది.
ఆడపిల్ల పుట్టిందని.. ఓ తల్లి ఏం చేసిందంటే?
లోకంలో ఏ ఇల్లాలైనా.. తల్లి కావాలని ముచ్చట పడుతుంది. కానీ నంద్యాలలో ఓ తల్లి తన పేగు బంధాన్ని మరిచింది. ఆడపిల్ల పుట్టిందని.. పాపను ఆస్పత్రిలోనే వదిలేసి వెళ్లిపోయింది. దీంతో ఆ పసిపాప అనాథగా మిగిలిపోయింది.
పేగు బంధాన్ని మరచిన ఓ తల్లి
మహిళ ప్రసవం కోసం వచ్చినప్పుడు గుర్తింపు ఆధారాలు సేకరించకపోవడం, ఆసుపత్రిలో సీసీ కెమెరాలు లేకపోవడంతో శిశువు తల్లిదండ్రులను పోలీసులు గుర్తించలేకపోయారు. దీంతో డాక్టర్ సుంకన్న.. ఆ పాపను ఐసీడీఎస్ అధికారులకు అప్పగించారు. ఈ శిశువును కర్నూలు శిశు సంక్షేమ శాఖకు తరలించారు. ఆ పాప తల్లిదండ్రులు మనసు మార్చుకొని వస్తే డీఎన్ఏ పరీక్ష అనంతరం వారికి అప్పగిస్తామని అధికారులు తెలిపారు. ఆసుపత్రి యాజమాన్యం.. తల్లిదండ్రులు ఇచ్చే కాసులే చూశారు తప్ప.. వారి వివరాలు నమోదు చేసుకోలేదు. ఇప్పటికైనా అధికారులు స్పందించాలని.. ఈ తరహా ఘటనలు పునరావృతం కాకుండా చర్యలు తీసుకోవాలని స్థానికులు కోరుతున్నారు.
ఇదీ చదవండి:"ఇక్కడ పండు చెబితేనే ఏదైనా...మాతో వస్తే నీ కష్టాలన్నీ తీరిపోతాయి"