'ఎంపీపీ ఎన్నికలో మా వాళ్లకు అన్యాయం జరిగితే నేనే వచ్చి తేల్చుకుంటా'
తూర్పుగోదావరి జిల్లా కడియం మండల పరిషత్ అధ్యక్ష ఎన్నికల ప్రక్రియను సజావుగా సాగేలా చూడాలని జనసేన పార్టీ అధ్యక్షులు పవన్ కళ్యాణ్ ప్రభుత్వాన్ని కోరారు. కడియం మండల జడ్పీటీసీ స్థానంతోపాటు అత్యధిక ఎంపీటీసీ స్థానాలను జనసేన పార్టీ గెలుచుకోవటంపై ఆయన హర్షం వ్యక్తం చేశారు. గెలిచిన అభ్యర్థులతో విజయవాడలో పవన్ సమావేశమయ్యారు. ఈ నెల 24న జరిగే మండలాధ్యక్ష పదవిని ఎలాగైనా దక్కించుకోవాలని అధికార పార్టీ నాయకులు ప్రయత్నాలు చేస్తున్నారని..,తమ పార్టీ సభ్యులపై తీవ్రమైన ఒత్తిడి తీసుకొస్తున్నారన్నారు. గెలిచిన అభ్యర్థులతో పాటు వారి కుటుంబ సభ్యుల్ని భయబ్రాంతులకు గురి చేస్తున్నారన్నారు. అధికార పార్టీ నేతలు పోలీసు అధికారులను వాడుకుని ఇబ్బందులకు గురి చేస్తున్నారని పవన్ ఆరోపించారు.