దేశంలోనే కలగా మిగిలిపోయిన, నదుల అనుసంధానాన్ని తెదేపా అధినేత చంద్రబాబు నిజం చేసి చూపించారని పార్టీ జాతీయ ప్రధాన కార్యదర్శి నారా లోకేశ్ గుర్తు చేశారు. పట్టిసీమ ద్వారా గోదావరి - కృష్ణా నదులను కలిపారని అన్నారు. అదే స్ఫూర్తితో గోదావరి, పెన్నా నదులను అనుసంధానం చేసి, సాగర్ ఆయకట్టుకి నీరు ఇవ్వాలని తలచారని చెప్పారు. అందులో భాగంగానే గోదావరి - పెన్నా అనుసంధానం తొలి దశ పనులు కూడా మొదలు పెట్టారని పేర్కొన్నారు.
2017లో ఈ ప్రాజెక్టుకు సంబంధించిన ప్రణాళికలు సిద్ధం చేశారని... 2018లో మొదటి దశ పనులు కూడా ప్రారంభించారని గుర్తు చేశారు. ఆ రోజు ఇదో పెద్ద స్కాం అని వైకాపా నేతలు మాట్లాడిన తీరుని వివరించారు. ఈ రోజు అదే ప్రాజెక్టు పేరు మార్చి.. వైఎస్ఆర్ పల్నాడు కరువు నివారణ పథకంగా రూ.6020 కోట్లతో అనుమతలు ఇవ్వటాన్ని ఏమంటారని ప్రశ్నించారు.