Yadadri brahmotsavam 2022 dates : రాష్ట్రంలోని ప్రసిద్ధ పుణ్యక్షేత్రమైన యాదాద్రి శ్రీలక్ష్మి నరసింహస్వామి వార్షిక బ్రహ్మోత్సవాలు మార్చి 4 నుంచి 14 వరకు జరగనున్నాయి. పదకొండు రోజుల పాటు కొనసాగే ఈ ఉత్సవాలకు ఇంకా 40 రోజులే మిగిలాయి. మరోవైపు పంచ నారసింహుల ఆలయ ప్రారంభోత్సవానికి ముహూర్తం ఖరారైన విషయం తెలిసిందే. ఆరేళ్లుగా నిలిచిపోయిన గర్భాలయంలోని మూలవర్యుల నిజ దర్శనాలకు తెర తీసేందుకు 'మహాకుంభ సంప్రోక్షణ'... తొలుత శ్రీ సుదర్శన మహా యాగం నిర్వహించనున్నారు. ఈ మహాక్రతువులకు రెండు వారాల ముందే వార్షిక బ్రహ్మోత్సవాలు ముగియనున్నాయి.
బ్రహ్మోత్సవాల వివరాలు..
ఈ మహాదివ్య పుణ్యక్షేత్రం ఖ్యాతి నలుదిశలా వ్యాపించేలా బాలాలయంలోనే వార్షిక ఉత్సవాలను 2017 నుంచి కొనసాగిస్తున్నారు. ఏటా ఫాల్గుణ మాసంలో నిర్వహించే స్వామి బ్రహ్మోత్సవాలు ఈసారి మార్చి4 నుంచి మొదలవుతాయని దేవస్థానం అధికారులు వెల్లడించారు. శ్రీస్వామి, అమ్మవార్ల తిరు కల్యాణమహోత్సవం అదే నెల 11(నవమి)న నిర్వహిస్తారు. మార్చి 14న ఏకాదశి రోజున ఉత్సవాలు ముగుస్తాయి.
ముస్తాబవుతున్న యాదాద్రి
మహా సంప్రోక్షణకు యాదాద్రి పుణ్యక్షేత్రాన్ని తీర్చిదిద్దుతున్నారు. సీఎం కేసీఆర్ కల సాకారమయ్యే తరుణం సమీపిస్తోంది. స్వయంభూ క్షేత్ర సందర్శనలో మూలవర్యులను దర్శించి పూజించాలని ఎదురుచూస్తున్న భక్త జనులు ఆశను నెరవేర్చేందుకు చినజీయర్ స్వామి ముహూర్తం నిర్ణయించిన విషయం విదితమే. ఈ మహాక్రతువుకు ముందస్తుగా జరపాల్సిన మహాయాగం నిర్వహణకు ఏర్పాట్లపై ప్రత్యేక దృష్టి సారించారు. క్షేత్రాభివృద్ధిలో చేపట్టిన పనులను వచ్చే మార్చి 20లోగా పూర్తి చేయడం కోసం... దేవాలయాభివృద్ధి ప్రాధికార సంస్థ కసరత్తులను ముమ్మరం చేసింది. ఈనెల 21న దేవాదాయశాఖ మంత్రి ఇంద్రకరణ్ రెడ్డి... యాదాద్రి క్షేత్రాభివృద్ధి పనులను పరిశీలించారు. మిగిలి ఉన్న పనులపై ఆరా తీశారు. మహాయాగానికి ముందే అన్ని పనులు పూర్తి చేయాలని ఆదేశించారు. ఈ నేపథ్యంలో గడువులోగా పూర్తి చేసేందుకు నడుం బిగించింది. ఆ క్రమంలో సంబంధిత అధికారులు, గుత్తేదారులతో ఇటీవల సమావేశం నిర్వహించింది.
నెల రోజుల్లో పనులు పూర్తి!
కొండపైన నిర్మితమవుతున్న నాలుగు అంతస్తులతో కూడిన దర్శన వరుసల సముదాయం మందిర రూపంగా తీర్చిదిద్దుతున్నారు. ఇది ఫిబ్రవరి నెలాఖరులోగా పూర్తి అవుతుందని అధికారులు చెబుతున్నారు. విద్యుద్దీకరణ పనులు త్వరలోనే పూర్తి కానున్నాయి. సాలహారాల్లో దేవతామూర్తుల విగ్రహాలను పొందుపరచాల్సి ఉంది. రెండు కనుమ దారుల మధ్య 40 అడుగుల ఎత్తులో నిర్మితమవుతున్న భారీ స్వాగత తోరణం పనులు ముమ్మరమయ్యాయి. మరో నెల రోజుల్లో పూర్తి అవుతాయని సంబంధిత అధికారులు చెబుతున్నారు.