చైనాలో ప్రేమ తమిళనాడులో వివాహం- రష్యా యువతిని పెళ్లాడిన చెన్నై యువకుడు

Chennai Man Marries Russian :తమిళనాడు చెన్నైకి చెందిన యువకుడు, రష్యా యువతి హిందూ సంప్రదాయాల ప్రకారం ఒక్కటయ్యారు. చైనాలోని ఓ కార్ల తయారీ సంస్థలో సహోద్యోగులుగా పనిచేస్తున్న సమయంలో ఏర్పడిన పరిచయం, క్రమంగా ప్రేమగా మారింది. ఇరు కుటుంబాల అంగీకారంతో ఈ జంట తిరుచెందూర్‌ మురుగన్‌ స్వామి సాక్షిగా వివాహం చేసుకున్నారు. తిరుచెందూర్‌ సుబ్రహ్మణ్య స్వామి ఆలయంలో జరిగిన 25కి పైగా వివాహాల్లో ఈ జంట ప్రత్యేక ఆకర్షణగా నిలిచింది.

చైనాలో పరిచయం ప్రేమగా మారి
తమిళనాడులోని చెన్నై మైలాపూర్‌కు చెందిన ఉదయశంకర్‌ చైనాలోని ఓ కార్ల తయారీ సంస్థలో పనిచేస్తున్నాడు. అదే సంస్థలో రష్యాకు చెందిన మారియా కూడా ఉద్యోగం చేస్తోంది. ఈ క్రమంలో ఇద్దరికీ పరిచయం ఏర్పడింది. తొలుత స్నేహంగా మొదలైన వారి పరిచయం కొంతకాలానికి ప్రేమగా మారింది. తమ ప్రేమ విషయాన్ని ఇద్దరూ కుటుంబ సభ్యులకు తెలియజేశారు. వీరి ప్రేమను ఇరు కుటుంబాలు అంగీకరించడంతో వివాహానికి ఏర్పాట్లు చేశారు. తమిళనాడులోని ప్రసిద్ధ తిరుచెందూర్‌ సుబ్రహ్మణ్య స్వామి ఆలయంలో వివాహం జరిపించాలని నిర్ణయించారు.

హిందూ సంప్రదాయాల ప్రకారం వివాహం
కుటుంబ సభ్యులు, బంధువుల సమక్షంలో తిరుచెందూర్‌ ఆలయం ముందు ఉన్న షణ్ముగవిలాస మండపంలో ఉదయశంకర్‌, మారియా వివాహం జరిగింది. హిందూ సంప్రదాయాల ప్రకారం వివాహ వేడుకను నిర్వహించారు. ఈ సందర్భంగా మారియా తన పేరును 'కీర్తన'గా మార్చుకున్నారు. తమిళనాడుకు చెందిన యువకుడు, రష్యాకు చెందిన యువతి సంప్రదాయ పద్ధతిలో వివాహం చేసుకోవడం ఆలయానికి వచ్చిన భక్తుల దృష్టిని ఆకర్షించింది. ఈ ప్రత్యేక వివాహాన్ని ఆసక్తిగా తిలకించిన భక్తులు నూతన దంపతులకు శుభాకాంక్షలు తెలిపారు.

సోషల్‌ మీడియాలో ప్రశంసలు
ఈ జంట వివాహానికి సంబంధించిన విషయాలు సోషల్‌ మీడియాలోనూ వైరల్‌గా మారాయి. సముద్రాలు దాటి ప్రేమలో పడిన ఈ జంట, కుటుంబాల అంగీకారంతో ఒక్కటవడంపై నెటిజన్లు అభినందనలు తెలిపారు. రష్యాకు చెందిన మారియా తన పేరును మార్చుకుని, తిరుచెందూర్‌ మురుగన్‌ స్వామి సాక్షిగా హిందూ సంప్రదాయాల ప్రకారం వివాహం చేసుకోవడాన్ని పలువురు ప్రశంసించారు.