விக்கிரவாண்டி, நாங்குநேரி சட்டப்பேரவைத் தொகுதி இடைத்தேர்தல்களில் அதிமுக வெற்றிபெற்றதைத் தொடர்ந்து இன்று விக்கிரவாண்டி வாக்காளர்களுக்கு நன்றி அறிவிப்பு பொதுக்கூட்டம் நடைபெற்றது.
சட்டத் துறை அமைச்சர் சி.வி. சண்முகம் தலைமையில் நடைபெற்ற இந்தக் கூட்டத்தில், முதலமைச்சர் எடப்பாடி பழனிசாமி கலந்துகொண்டு சிறப்புரையாற்றினார். அப்போது பேசிய அவர், "நாடாளுமன்றத் தேர்தலில் பொய் வாக்குறுதிகளை அளித்து ஸ்டாலின் வெற்றிபெற்றார். ஆனால், தமிழ்நாடே எதிர்பார்த்த விக்கிரவாண்டி, நாங்குநேரி தொகுதி இடைத்தேர்தல்களில் அதிமுக அபார வெற்றிபெற்றுள்ளது. நாடாளுமன்றத் தேர்தல் வேறு; சட்டப்பேரவைத் தேர்தல் வேறு என்பதை மக்கள் மீண்டும் நிரூபித்துள்ளனர்.
சிலர் இன்று அரசியலுக்கு வர ஆசைப்படுகின்றனர். யார் வேண்டுமானாலும் கட்சி ஆரம்பிக்கலாம். ஆனால், ஆட்சிக்கு வருவது அதிமுக மட்டும்தான். 67 ஆண்டுகளாக வேறு தொழில் செய்த சிலர் அரசியலுக்கு வர நினைக்கின்றனர். இவர்கள் பாதி நாள்கள் நாட்டிலும் மற்ற நாள்கள் வெளிநாட்டிலும்தான் இருப்பார்கள். அவர்கள் அரசியலையும் தொழில் என்று நினைத்துக் கொண்டிருக்கின்றனர்.