திருப்பத்தூர்:நாட்றம்பள்ளி அடுத்த பச்சூர் பகுதியில் பாரதிதாசன் பொரியல் கல்லூரி அமைந்துள்ளது. இக்கல்லூரியின் 17வது பட்டமளிப்பு விழா இன்று நடைபெற்றது. இதில் சிறப்பு விருந்தினராகப் பத்மஸ்ரீ விருது பெற்ற, முன்னாள் இஸ்ரோ இயக்குநர் மயில்சாமி அண்ணாதுரை கலந்து கொண்டு மாணவ மாணவிகளுக்குப் பட்டமளித்தார்.
இதனைத் தொடர்ந்து மாணவர்களுக்கு மத்தியில் ’அச்சம் தவிர்’ என்ற தலைப்பில் மாணவர்களை ஊக்குவிக்கும் விதமாக அவர் பேசியதாவது “ செவ்வாய்க் கோள் ஆராய்ச்சிக்கு விண்கலத்தை அனுப்பும் முயற்சி1960களிலேயே தொடங்கிவிட்டது.
இதில் அமெரிக்கா 5 ஆவது முறையும், ரஷ்யா 9 ஆவது முறையும் முயற்சி செய்து வெற்றியடைந்தது. அதிலும் குறிப்பாக ஜப்பான், சீனா உள்ளிட்ட நாடுகள் செல்ல ஒரு அச்சமடைந்து கொண்டு இருந்த சூழ்நிலையில், அந்த அச்சத்தைத் தவிர்த்து 2013 ஆம் ஆண்டு நாம் அனுப்பி மங்கள்யான் செவ்வாய் சுற்றுப்பாதையில் வெற்றிகரமாகச் செலுத்தப்பட்டது. அப்போது அறிவியலில் இந்தியா புதிய சரித்திரம் படைத்தது.
இதன் வெற்றி பயணத்தில் உழைத்த பலநூறு அறிவியலாளர்களில், 90 சதவிகிதம் பேர் அரசு பள்ளிகளில் தாய் மொழியில் படித்தவர்கள். எனவே அரசுப் பள்ளிகள் படிப்பது குறித்து அச்சம் தவிர்க்க வேண்டும். தாய் மொழி கல்வி தவறெனக் கருதும் எண்ணத்தை விட்டு சாதனையாளராக வளர வேண்டும்.