சேலம்: மல்லூர் அடுத்த வேங்கம்பட்டி அருகே உள்ளது ஓட்டேரி. சுமார் 60 ஏக்கர் பரப்பளவு கொண்ட இந்த ஏரிக்கு பருவ மழைக் காலங்களில் பனமரத்துப்பட்டி ஏரி, பெரிய ஏரி, பெத்தாம்பட்டி ஏரி ஆகிய பகுதிகளில் இருந்து மழை நீர் வந்து சேரும். இந்த நீர் வளத்தை வைத்து இந்த பகுதியில் ஆயிரக்கணக்கான ஏக்கரில் விவசாயிகள் விவசாயம் செய்து பயன் அடைந்து வருகின்றனர்.
இந்த நிலையில் தற்போது ஏரியில் நீர் வற்றியுள்ளதால் அந்த பகுதி முழுவதும் மணல் நிறைந்த பகுதிகளாக உள்ளது. இந்த நிலையில், மல்லூர் பேரூராட்சி இரண்டாவது வார்டு கவுன்சிலராக உள்ள கோமதி பழனிவேல் மற்றும் அவரது அடியாட்கள், சட்ட விரோதமாக மணல் மற்றும் நொரம்பு மண்ணை எடுத்து விற்பனை செய்து வருவதாக புகார் எழுந்துள்ளது.
இந்த மண் மற்றும் மணல் கடத்தலுக்கு, கிராம மக்கள் பலமுறை எதிர்ப்பு தெரிவித்தும் மணல் கடத்தல் நிறுத்தப்படவில்லை. இந்நிலையில் நாள்தோறும் இரவு நேரங்களில் மணல் கடத்தல் நடந்து வருகிறது. இதுவரை 400 லோடுகளுக்கு மேல் மணல் அள்ளப்பட்டதாக கிராம மக்கள் தெரிவித்துள்ளனர். இதுகுறித்து ஆட்சியர் அலுவலகம் மற்றும் காவல் துறையில் புகார் அளித்தும் எந்த ஒரு நடவடிக்கையும் எடுக்கப்படவில்லை என்று கூறப்படுகிறது.