குமரி மாவட்டம் குளச்சலைச் சேர்ந்த ஆண்டோ லெனின் என்பவர் உயர் நீதிமன்ற மதுரைக்கிளையில் மனு ஒன்றை தாக்கல் செய்திருந்தார்.
அந்த மனுவில், "கடந்த அக்டோபர் மாதம் வங்கக் கடலில் கியார்க் புயல் உருவானது. அதற்கு முன்பாகவே பல மீனவர்கள் மீன்பிடிக்க கடலுக்குச் சென்ற நிலையில், பலர் கரை திரும்பிவிட்டாலும் இன்னும் பலர் திரும்பவில்லை.
குறிப்பாக ஜெர்மியா, லூர்து அன்னை, புனித மேரி, கார்மேல் மாதா, பசிலிக்கா ஆகிய படகில் சென்ற 59 மீனவர்கள் இன்னும் கரை திரும்பவில்லை. மீனவ சங்கம் சார்பில் கடலில் சென்று தேடிய நிலையிலும் அவர்களைக் கண்டுபிடிக்க இயலவில்லை. ஆகவே, கியார்க் புயலில் காணாமல்போன மீனவர்களைக் கண்டுபிடிக்க தேடுதல் மற்றும் மீட்புக்குழு அமைக்க உத்தரவிட வேண்டும்" எனக் கூறியிருந்தார்.