சென்னை: நடிகர் ரஜினிகாந்த் மருத்துவப் பரிசோதனைக்காக அமெரிக்கா சென்றுள்ள நிலையில், செல்பி வீடியோ எடுப்பது குறித்து தனது கார் ஓட்டுநரிடம் சந்தேகங்களை கேட்கும் வீடியோ காட்சி தற்போது சமூக வலைத்தளங்களில் வைரலாக பரவி வருகிறது.
நெல்சன் இயக்கத்தில் ரஜினிகாந்த் நடிப்பில் வெளியான ‘ஜெயிலர்’ திரைப்படம் பெரும் வரவேற்பைப் பெற்றது. பட்டிதொட்டி எங்கும் படம் வசூல் மழை பொழிந்தது. இந்தியா மட்டுமின்றி ஜப்பான், கனடா, அமெரிக்கா உள்ளிட்ட நாடுகளில் படம் வெளியாகி வசூல் சாதனை படைத்தது. ஜெயிலர் பட வெற்றியை தொடர்ந்து நடிகர் ரஜினி தொடர் சுற்றுப்பயணம் மேற்கொண்டு வருகிறார்.
உத்தரபிரதேசம் உள்ளிட்ட வட இந்திய பகுதிகளுக்கு மலேசியா உள்ளிட்ட வெளிநாடுகளுக்கும் சென்று நடிகர் ரஜினிகாந்த் ஓய்வை கழித்து வருகிறார். அடுத்ததாக, ஜெய்பீம் பட இயக்குனர் டி.ஜே.ஞானவேல் இயக்கத்தில் நடிகர் ரஜினிகாந்த் நடிக்க உள்ளார். இது அவரது 170 வது திரைப்படமாகும்.
தலைவர் 170 என்ற தற்காலிகமாக பெயரிடப்பட்டு உள்ள இந்த திரைப்படத்தின் படப்பிடிப்பு வரும் 4ஆம் தேதி திருவனந்தபுரத்தில் தொடங்குகிறது. அதற்காக செட் அமைக்கும் பணிகள் நடைபெற்று வருகின்றன. முதற்கட்ட படப்பிடிப்பில் நடிகர் ரஜினிகாந்தின் காட்சிகள் படமாக்கப்பட உள்ளதாக தகவல் வெளியாகி உள்ளது.
மேலும், இப்படத்தில் ரஜினிகாந்த் உடன் பகத் பாசில், மஞ்சு வாரியர், ராணா, ரித்திகா சிங் உள்ளிட்ட நட்சத்திர பிரபலங்கள் நடிக்க உள்ளதாக தகவல் வெளியாகி உள்ளது. இறுதியாக வெளியான ரஜினிகாந்தின் ஜெயிலர் திரைப்படத்திற்கு இசையமைத்த அனிருத், இந்த படத்திற்கும் இசை அமைக்கிறார்.