சென்னை: பண மோசடி வழக்கில் அமலாக்கத்துறையால் கைது செய்யப்பட்ட செந்தில் பாலாஜியை இலாகா இல்லாத அமைச்சராக தமிழ்நாடு முதலமைச்சர் மு.க.ஸ்டாலின் நியமித்ததைத் தொடர்ந்து, நேற்று (ஜூன்.29) தமிழ்நாடு ஆளுநர் ஆர்.என்.ரவி செந்தில் பாலாஜியை டிஸ்மிஸ் செய்து ஒரு செய்தி அறிக்கையை வெளியிட்டார். இவ்வாறு ஆளுநர் வெளியிட்ட அந்த நோட்டீஸுக்கு பல்வேறு அரசியல் கட்சி தலைவர்களும், பிரமுகர்களும் கண்டனம் தெரிவித்து வருகின்றனர்.
திராவிடர் கழகத் தலைவர் கி.வீரமணி: "இலாகா இல்லாத அமைச்சராக செந்தில் பாலாஜியை முதலமைச்சர் நியமித்ததை தமிழ்நாடு ஆளுநர் ஆர்.என்.ரவி டிஸ்மிஸ் செய்து ஒரு செய்தியை வெளியிட்டுள்ளார். இது முழுக்க முழுக்க அவர் பதவிப் பிரமாண்ம் எடுத்துக் கொண்டுள்ள அரசியல் சட்டத்திற்கு முற்றிலும் விரோதமானது என்பதால், அரசியல் சட்டத்திற்கு எதிரான ஆளுநரின் இந்த சட்ட முரணான, அதீத நடவடிக்கைக்கு வன்மையான கண்டனத்தைத் தெரிவித்துக் கொள்கிறோம்.
இப்படி ஓர் அமைச்சரை டிஸ்மிஸ் செய்யும் ஆணையை ஆளுநர் ரவி இந்திய அரசியலமைப்புச் சட்டத்தின் எந்தப் பிரிவின் கீழ் பிறப்பித்துள்ளார் என்பதை விளக்குவாரா?. எப்படி ஓர் அமைச்சரை ஆளுநரால் தன்னிச்சையாக நியமிக்க முடியாதோ, அதே போன்று அவரால் பதவி நீக்கமும் செய்ய முடியாதே!.
அரசியல் சட்டப்படி (கூறுகள் 163, 164 (1)) முதலமைச்சரின் அறிவுரைப்படிதான் ஆளுநர் எந்த அமைச்சரையும் நியமிக்கவும் முடியும், நீக்கவும் முடியும். ஆளுநருக்கென்று எந்த தனி அதிகாரமும் கிடையாது. ஒருவர் மீது விசாரணை நடப்பதாலோ, நீதிமன்றத்தில் வழக்கு நடப்பதாலோ அந்த அமைச்சரை நீக்கச் சட்டத்தில் இடம் கிடையாது.
ஒரு வழக்கில் குற்றவாளி என்று தீர்ப்பு வந்த பிறகே, அதிலும் கூட 2 ஆண்டுகளுக்கு மேல் தண்டனையை நீதிமன்றம் அளித்தால்தான் அமைச்சரையோ அல்லது அதுபோன்ற வேறு பதவிகள் வகிப்போரையோ நீக்க முடியும் என்ற சட்டத்தைக் கூட ஆளுநர் அறியமாட்டாரா?. தமிழ்நாடு திமுக அரசு மக்களின் அபரிமித ஆதரவைப் பெற்றுள்ளது என்பதால், வேண்டுமென்றே அதற்கு எதிராக இப்படி திட்டமிட்ட வம்பு, வல்லடியை இந்த ஆளுநர் உருவாக்குகிறார்.
மக்களால் தேர்ந்தெடுக்கப்பட்ட ஆட்சிக்கு எதிராக வியூகம் வகுக்கிறார். இவரைப் பின்புலத்திலிருந்து இயக்குவோருக்கு நிச்சயம், மக்கள் தேர்தலில் பாடம் புகட்டுவர் என்பது உறுதி. ஆளுநருக்கு எதிராகக் கண்டனக் குரலை எழுப்பி, ஜனநாயகத்தைக் காப்பது தமிழ்நாட்டு மக்கள் அனைவரது முக்கியக் கடமையாகும். அரசியல் சட்டத்தையும், ஜனநாயகத்தையும் காப்பாற்ற வேண்டிய கடமை அனைத்துத் தரப்புக்கும் உண்டு.
சட்டப் போராட்டம், சட்டமன்றப் போராட்டம், மக்களின் அறப் போராட்டம் ஆகியவையே சரியான தீர்வு ஆகும். முன்பு சட்டமன்றத்தை அவமதித்து வெளிநடப்புச் செய்தார். இப்போது அரசியல் சட்டத்தைச் சிதைத்துச் சின்னாபின்னமாக்கி, எல்லை தாண்டி, மக்களால் தேர்ந்தெடுக்கப்பட்ட அரசுக்கு சவால் விடுகிறார். சந்திக்கத் தயாராகவே இருக்கிறோம் என தனது ட்விட்டர் பக்கத்தில் பதிவிட்டுள்ளார்.