சென்னை:அசோக் நகரில் உள்ள விடுதலை சிறுத்தைகள் கட்சியின் தலைமை அலுவலகத்தில் விசிக தலைவர் திருமாவளவன் செய்தியாளர்களை சந்தித்தார். அப்போது பேசிய அவர், "ஆந்திர மாநிலம் குண்டூரில் மண்டல கமிஷன் தலைவராக இருந்த பி.பி.மண்டலுக்கு அங்கு உள்ள ஓ.பி.சி அமைப்பை சேர்ந்தவர்கள் சிலை வைத்துள்ளனர். இந்த சிலையை நிறுவும் முன்பே அதை ஆந்திர அரசு தகர்த்து உள்ளது. இது அவருக்கு செய்து இருக்கிற அவமதிப்பு, இதை விசிக வன்மையாக கண்டிக்கிறது.
அதே இடத்தில் அந்த சிலை வைக்கவும் வலியுறுத்துகிறோம். தமிழ்நாட்டில் அவருக்கு சிலை வைக்க வேண்டும். அகில இந்திய அளவில் அவரது பங்களிப்பு மகத்தானது. தேவைப்பட்டால் ஆந்திர விசிக சார்பில் குண்டூரில் ஆர்ப்பாட்டம் நடத்தப்படும். ஆர்எஸ்எஸ் பேரணிக்கு தமிழ்நாடு அரசு தடை விதித்து இருப்பது சரியானது.
அரசின் காரணங்களும் ஏற்புடையது. தடை விதித்து இருக்கின்ற காரணத்தை விசிக ஏற்கிறது. அதே நேரத்தில் விசிகவின் சமூக நல்லிணக்க பேரணிக்கு அனுமதி மறுக்கப்பட்டுள்ளது அதிர்ச்சி அளிக்கிறது. 25 கட்சிகள் மனித சங்கிலி பேரணியில் பங்கேற்பதாக கூறியிருந்த நிலையில் இதற்கு தடை விதித்திருப்பது எந்த வகையிலும் நியாயமில்லை.
விடுதலை சிறுத்தைகளும் ஆர்எஸ்எஸ் அமைப்பும் ஒன்றல்ல. ஆர்எஸ்எஸ் போன்று மதவாத வெறுப்பு அரசியலை பேசும் அமைப்பு நாங்கள் இல்லை. மொட்டை தலைக்கும், முழங்காலுக்கும் முடிச்சு போட வேண்டாம். அக்டோபர் 2ஆம் தேதி ஆர்எஸ்எஸ் அமைப்பு தமிழ்நாட்டில் பேரணி நடத்துவதில் உள் நோக்கம் உள்ளது. போட்டிக்கு நாங்கள் பேரணி நடத்துவதாக பாஜக சொல்வதை ஏற்கிறேன். காந்தியை படுகொலை செய்தவர்கள் ஆர்எஸ்எஸ் காரர்கள் என்பது உலகறிந்த உண்மை.