சென்னை நந்தனம் ஒய்எம்சிஏ மைதானத்தில் நுண்ணறிவுப் பிரிவு துணை ஆணையர் திருநாவுக்கரசு எழுதிய புத்தகமான 'குறள் அமுது கதை அமுது' மற்றும் அவரது துணைவியார் தனுஷ்கோடி லாவண்யா ஷோபனா எழுதிய 'காக்கிச் சட்டை' என்ற புத்தகத்தின் வெளியீட்டு விழா நடைபெற்றது.
இதில், சிறப்பு விருந்தினராக காவல் ஆணையர் ஏ.கே. விஸ்வநாதன், கூடுதல் ஆணையர் ஈஸ்வர மூர்த்தி, நடிகர் தாமு, பேச்சாளர் சுகி சிவம் உட்பட பலர் பங்கேற்றனர். நிகழ்வில் ஏ.கே. விஸ்வநாதன் இரண்டு புத்தகங்களையும் வெளியிட்டார். நிகழ்வில் பேசிய சுகி சிவம், காவல்துறையினரை பொதுமக்கள் இகழ்ந்தாலும், பாராட்டினாலும் எல்லாவற்றையும் சமமாக நினைக்கின்ற மனோநிலைக்கு காவல்துறையினர் வந்துவிடுவார்கள்.
காவல் ஆணையர் அருகில் உட்கார்ந்திருந்தபோது நான் அவர் பள்ளியில் படிக்கும் போது உரையாற்றியதாக நினைவு கூர்ந்தார். அதற்கு தமிழ்படித்தவர்கள் ஓய்வு எடுத்ததாக வரலாறே இல்லை என்று நான் தெரிவித்தேன். திருக்குறளை கதையாக எழுதி புத்தகம் வெளியிட்ட ஆணையருக்கும் காவலர்களின் குழந்தைகளின் உணர்ச்சிகளை உணர்வு பூர்வமாக எழுதிய லாவண்யா சோபனா ஆகியோருக்கு மனமார்ந்த வாழ்த்துகள்" என்றார்.