தோஹா (கத்தார்): பிபா உலகக் கோப்பை கால்பந்து திருவிழா கத்தார் தலைநகர் தோஹாவில் கோலாகலமாக நடந்து வருகிறது. லீக் சுற்று ஆட்டங்கள் விறுவிறுப்பாக நடந்து வருகின்றன. சிறிய அணிகளும் பலம் வாய்ந்த அணிகளுக்குச் சரிநிகராக விளையாடி வருகின்றன.
"ரவுண்ட் 16" சுற்றுக்கு பிரான்ஸ் தகுதி:
குரூப் ‘டி’ பிரிவில் நடந்த லீக் ஆட்டத்தில் நடப்பு சாம்பியன் பிரான்ஸ் அணி, டென்மார்க்குடன் கோதாவில் இறங்கியது. ஆரம்பம் முதலே ஆதிக்கம் செலுத்தி வந்த பிரான்ஸ் அணியில், வீரர் கைலியன் எம்பாப்பே (Kylian Mbappe) 61 மற்றும் 86 நிமிடங்களில் அடுத்தடுத்து கோல் திருப்பி அணியை வெற்றிப் பாதைக்கு அழைத்துச் சென்றார்.
மறுபுறம் டென்மார்க் வீரர் ஆண்டிரியஸ் கிரிஸ்டென்சன் 68-வது நிமிடத்தில் பதில் கோல் திருப்பினார். இறுதி வரை போராடிய டென்மார்க் அணி 2- 1 என்ற கோல் வித்தியாசத்தில் தோல்வியைத் தழுவியது. இந்த வெற்றியின் மூலம் "ரவுண்ட் 16" சுற்றுக்கு முதல் அணியாக பிரான்ஸ் முன்னேறியது.