நடப்பு சீசனுக்கான ரஞ்சி கிரிக்கெட் தொடரின் மூன்றாம் சுற்றுப் போட்டிகள் பல்வேறு நகரங்களில் இன்று தொடங்கின. இதில், இந்தூரில் நடைபெற்றுவரும் போட்டியில் குரூப் ஏ மற்றும் பி பிரிவில் இடம்பெற்றுள்ள தமிழ்நாடு - மத்திய பிரதேச அணிகள் மோதின.
முக்கிய வீரர்கள் இல்லாமல் களமிறங்கிய தமிழ்நாடு:
ஏற்கனவே இரண்டாம் சுற்று ஆட்டத்தில் முரளி விஜய், தினேஷ் கார்த்திக், விஜய் சங்கர், முருகன் அஸ்வின், அபினவ் முகுந்த் ஆகியோர் தமிழ்நாடு அணியில் பங்கேற்காத நிலையில், இன்றைய ஆட்டத்தில் ரவிச்சந்திரன் அஸ்வினும் அணியில் இடம்பெறவில்லை.
பேட்டிங்கில் சொதப்பிய தமிழ்நாடு:
இதையடுத்து, இப்போட்டியில் முதலில் பேட்டிங் செய்த தமிழ்நாடு அணி கேப்டன் பாபா அபராஜித், தொடக்க வீரர் கங்கா ஸ்ரீதர் ராஜூ, ஹரி நிஷாந்த் ஆகியோரைத் தவிர மற்ற வீரர்கள் அனைவரும் ஒற்றை இலக்கு ரன்னிலேயே அவுட்டாகினர். இறுதியில் தமிழ்நாடு அணி 59 ஓவர்களில் 149 ரன்களுக்கு அனைத்து விக்கெட்டுகளையும் இழந்தது.
கங்கா ஸ்ரீதர் ராஜூ 43 ரன்களிலும், ஹரி நிஷாந்த் 22 ரன்களிலும் ஆட்டமிழந்த நிலையில், பாபா அபராஜித் 11 பவுண்டரிகள் அடித்து 61 ரன்களுடன் இறுதிவரை ஆட்டமிழக்கமால் களத்திலிருந்தார். மத்திய பிரதேச அணி தரப்பில் ஈஷ்வர் பாண்டே ஆறு விக்கெட்டுகளை வீழ்த்தினார்.