இந்தியா - நியூசிலாந்து அணிகளுக்கு இடையிலான இரண்டு போட்டிகள் கொண்ட டெஸ்ட் தொடரின் முதல் போட்டி நாளை மறுநாள் வெலிங்டனில் தொடங்கவுள்ளது. இப்போட்டிக்காக இரு அணி வீரர்களும் தீவிர வலைப்பயிற்சியில் ஈடுபட்டுவருகின்றனர். இந்த நிலையில், இப்போட்டியிலிருந்து நியூசிலாந்து அணியின் இடதுகை பந்துவீச்சாளர் நைல் வாக்னர் விலகியுள்ளார்.
அவருக்கும் அவரது மனைவி லானாவுக்கும் முதல் குழந்தை இந்த வாரத்தின் இறுதியில் பிறக்கவுள்ளதால், நைல் வாக்னர் இப்போட்டியில் பங்கேற்கமாட்டார் எனவும், குழந்தை பிறக்கும் வரை அவர் தவுரங்காவில் இருப்பார் எனவும் நியூசிலாந்து கிரிக்கெட் வாரியம் அறிவித்துள்ளது. அவருக்குப் பதிலாக மேட் ஹென்றி அணியில் மாற்றுவீரராகச் சேர்க்கப்பட்டுள்ளார் எனவும் தெரிவித்துள்ளது. 33 வயதான நைல் வாக்னர் நியூசிலாந்து அணிக்காக இதுவரை 46 டெஸ்ட் போட்டிகளில் விளையாடி 204 விக்கெட்டுகளை கைப்பற்றியுள்ளார்.