சென்னை:அழகான காதலை எதார்த்தமான வாழ்வியலோடு சொல்லும் விதமாக உருவாகியிருக்கும் 'மழையில் நனைகிறேன்' திரைப்படம் சென்னை திரைப்பட விழாவில் திரையிட தேர்வாகியுள்ளது.
ராஜ் ஸ்ரீ வென்ச்சர்ஸ் நிறுவனம் சார்பில் தயாரிப்பாளர்கள் ராஜேஷ்குமார், ஸ்ரீவித்யா ராஜேஷ் ஆகியோர் தயாரிக்க, சுரேஷ் குமார் இயக்கி இருக்கும் படம் 'மழையில் நனைகிறேன்'. எதார்த்தமான வாழ்வியலுடன் அழகான காதலை சொல்லும் இந்தப் படம் சென்னை திரைப்பட விழாவில் திரையிட தேர்வு செய்யப்பட்டுள்ளது.
படம் குறித்து இயக்குநர் டி. சுரேஷ் குமார் கூறியதாவது:
பொறியியல் படித்த ஒரு பிராமணப் பெண்ணுக்கும், படித்து விட்டு வேலை இல்லாமல் சுற்றிக் கொண்டு இருக்கும், ஒரு கிறிஸ்த்தவ இளைஞனுக்கும், ஏற்படும் காதலும் அதன் விளைவுகளுமே இந்தப் படம்.
காதலில் ஒரு பிரச்னை வரும்போது ஒன்று காதலர்கள் காயப்பட வேண்டி இருக்கிறது. இல்லையென்றால் காதலர்களின் பெற்றோர் காயப்பட வேண்டி இருக்கிறது. இதைப் பற்றியும் இந்தப் படம் பேசுகிறது.
படத்தில் சண்டைக் காட்சி இருந்தாலும் வில்லன் என்று யாரும் இல்லை. நாயகி அறிமுக காட்சியும், இறுதிக் காட்சியும் மழையில் நடக்கும். அதனால்தான் 'மழையில் நனைகிறேன்' என்ற இந்தப் பெயர் பொருத்தமாக இருக்கும் என வைத்தோம்.