மாஸ் லுக்கில் சிம்பு ; இணையத்தில் வைரலாகும் புகைப்படம்!

சென்னை:நடிகர் சிம்பு நடிப்பில் கடைசியாக ‘வெந்து தணிந்தது காடு’ திரைப்படம் வெளியானது. கௌதம் மேனன் இயக்கத்தில் வெளியான ‘வெந்து தணிந்தது காடு’ திரைப்படம் கலவையான விமர்சனங்களைப் பெற்றது. ஏஆர் ரஹ்மான் இசையில் பாடல்கள் வெற்றிபெற்றன. இதனைத்தொடர்ந்து சிம்பு நடிப்பில் ‘பத்து தல’ திரைப்படம் வெளியாக உள்ளது.

‘சில்லுனு ஒரு காதல்’ திரைப்படத்தை இயக்கிய கிருஷ்ணா இந்தப் படத்தை இயக்கி உள்ளார். கன்னடத்தில் வெளியாகி வெற்றி பெற்ற ‘மஃப்டி’ படத்தின் ரீமேக்கான ‘பத்து தல’ படத்தில் சிம்பு முக்கிய கதாப்பாத்திரத்தில் நடித்துள்ளார். இவருடன் கௌதம் கார்த்திக், பிரியா பவானி சங்கர், கௌதம் மேனன் உள்ளிட்டோர் நடித்துள்ளனர். இப்படத்திற்கும் ஏஆர் ரஹ்மான் தான் இசை அமைத்துள்ளார்.

இந்த படத்தின் இசை வெளியீட்டு விழா நாளை (மார்ச் 17) சென்னை நேரு உள்விளையாட்டு அரங்கில் பிரமாண்டமாக நடைபெற உள்ளது. இந்த விழாவில் ஏராளமான திரை நட்சத்திரங்கள் கலந்துகொள்ள உள்ளனர். சமீப காலமாக நடிகர் சிம்பு வெளிநாட்டில் இருந்தார். பாங்காங்கில் ஏதோ பயிற்சி வகுப்பில் பங்கேற்று வந்துள்ளார். இதனால் ‘பத்து தல’ படத்தின் சிம்புவின் டப்பிங் பணிகள் கூட அங்குதான் நடைபெற்றன.

‘பத்து தல’ படத்திற்காக நீண்ட தாடியுடன் காணப்பட்டார், சிம்பு. தற்போது தாடி இன்றி மீண்டும் இளமையுடன் காணப்படும் புகைப்படத்தை தனது ட்விட்டர் பக்கத்தில் பகிர்ந்துள்ளார். இந்த புகைப்படத்தை பார்த்த ரசிகர்கள் 'கெட்டவன்' காலத்து சிம்புவை பார்ப்பது போல் உள்ளதாக பதிவிட்டு வருகின்றனர். மீண்டும் கெட்டவன் படத்தை இயக்கும் திட்டத்தில் சிம்பு இருக்கிறாரா என்றும் கேட்டு வருகின்றனர்.

தற்போது பத்து தல ஆடியோ வெளியீட்டு விழாவில் பங்கேற்க சென்னை வந்துள்ளார், சிம்பு. இந்த நிலையில் சிம்புவின் புகைப்படங்கள் சமூக வலைதளங்களில் வைரல் ஆகி வருகிறது. கடந்த சில வருடங்களுக்கு முன் உடல் எடை அதிகரித்து காணப்பட்ட சிம்பு மிகவும் கிண்டலுக்கு உள்ளானார். மேலும் சிம்புவின் இந்த தோற்றம் அவரது ரசிகர்களுக்கு சோகத்தை ஏற்படுத்தியிருந்தது.

மாஸ் லுக்கில் சிம்பு

பின்னர் தனது கடின உடற்பயிற்சிக்குப் பிறகு மீண்டும் பழைய சிலம்பரசனாக மாறினார். கிண்டல் செய்தவர்கள் சிம்புவின் தற்போதைய உருவத்தைப் பார்த்து புருவம் உயர்த்தினர். உடல் எடையை குறைத்து நடித்த ஈஸ்வரன் திரைப்படம் ஓரளவுக்கு ரசிக்கப்பட்டது. வெந்து தணிந்தது காடு படத்தில் மிகவும் ஒல்லியாக காட்சியளித்தார்.

தற்போது வெளியாகியுள்ள சிம்புவின்‌ புகைப்படங்கள் சமூக வலைத்தளங்களில் வைரல் ஆகி வருகிறது. சிம்பு தனது படத்தின் ஆடியோ வெளியீட்டு விழாவில் பேசும் விஷயங்கள் வைரலாகும். இதனால் பத்து தல ஆடியோ விழாவில் சிம்பு பேசும் பேச்சுக்காக அவரது ரசிகர்கள் மிகுந்த உற்சாகத்துடன் காத்துக்கொண்டு இருக்கின்றனர்.

இதையும் படிங்க:'கண்ணை நம்பாதே' படத்தில் ஜெயலலிதா, பாஜக குறித்து ஆட்சேபனை வசனம் - இயக்குனர் மாறன் விளக்கம்