நடிகர் சந்தான பாரதியின் சகோதரர் நடிகர் ஆர்.எஸ்.சிவாஜி மரணம்!

அபூர்வ சகோதரர்கள், கோலமாவு கோகிலா, கார்கி உள்ளிட்ட படங்களில் நடித்த நடிகர் ஆர்.எஸ்.சிவாஜி உடல்நலக் குறைவு காரணமாக இன்று (செப். 2) உயிரிழந்தார்.

சென்னை:கோலமாவு கோகிலா படத்தில் நடிகை நயன்தாராவிற்கு தந்தையாக நடிகர் குணசித்திர நடிகர் ஆர்.எஸ். சாரதி காலமானார். அவருக்கு 66 வயது. பழம்பெரும் தயாரிப்பாளர் ஆர்.எஸ். சந்தானத்தின் மகனும், நடிகர் சந்தான பாரதியின் சகோதரருமான நடிகர் ஆர்.எஸ். சிவாஜி, தமிழ் சினிமாவில் பல்வேறு திரைப்படங்களில் நடித்துள்ளார்.

கடந்த 1981இல் தனது சகோதரர் சந்தான பாரதி இயக்கிய பன்னீர் புஷ்பங்கள் என்ற படத்தின் மூலம் நடிகராக அறிமுகமானார். பின்னர் விக்ரம், சத்யா, அபூர்வ சகோதரர்கள், மாப்பிள்ளை, மைக்கெல் மதன காமராஜன், குணா, பூவே உனக்காக, குட்டி என பல்வேறு படங்களில் நடித்தார். நடிகர் கமல்ஹாசன் படங்களில் முக்கிய கதாபாத்திரங்களில் நடித்து வந்தார்.

குறிப்பாக அபூர்வ சகோதரர்கள் படத்தில் நடிகர் ஜனகராஜுடன் காமெடி காட்சிகளில் ‘சார் நீங்க எங்கேயோ போய்ட்டிங்க’ என்ற வசனம் மிகவும் பிரபலமடைந்தது. இயக்குநர் நெல்சன் இயக்கிய ’கோலமாவு கோகிலா’ படத்தில் காமெடி கலந்த குணச்சித்திர கதாபாத்திரத்தில் நடித்தார். கடந்த 2022இல் சாய் பல்லவி நடித்து வெளியான ‘கார்கி’ திரைப்படத்தில் ஆர்.எஸ்.சிவாஜியின் கதாபாத்திரம் மிகப்பெரிய அளவில் பேசப்பட்டது.

இந்நிலையில் நடிகர் ஆர்.எஸ்.சிவாஜி இன்று காலை உடல்நலக் குறைவு காரணமாக உயிரிழந்தார். அவர் சர்க்கரை நோயால் அவதிப்பட்டு வந்துள்ளார். சமீபத்தில் ‘நான் உயிரோடு இருப்பதற்கு காரணம் கமல் தான். என் இதயத்தில் 4 ஓட்டைகள் இருந்தது. சிகிச்சைக்கு அவரிடம் தான் உதவி கேட்டேன். எனக்கான எல்லா சிகிச்சையையும் அவரே பார்த்துக் கொண்டார். அதே போல், கரோனா காலத்தில் மாத்திரைகள் வாங்கவும் அவரிடம் உதவி கேட்டேன்.

அப்போது முதல் இப்போது வரை எனக்கு ராஜ் கமல் பிலிம்ஸ் நிறுவனத்திலிருந்து மாதம் மாதம் மாத்திரைகள் வந்து கொண்டிருக்கிறது. கமல் சார் இல்லையேல் நான் இல்லை’ என கமல்ஹாசன் தனக்கு பல்வேறு உதவிகளை செய்து வருவதாக நடிகர் ஆர்.எஸ்.சிவாஜி தெரிவித்து இருந்தார். இந்நிலையில் அவர் உயிரிழந்தது திரையுலகினர் இடையே சோகத்தை ஏற்படுத்தியுள்ளது. திரைத்துறையை சேர்ந்தவர்கள் பலர் நடிகர் ஆர்.எஸ்.சிவாஜி மறைவுக்கு இரங்கல் தெரிவித்து வருகின்றனர்.

இதையும் படிங்க: மலையாள நடிகை அபர்ணா நாயர் மர்மமான முறையில் உயிரிழப்பு?... போலீசார் விசாரணை