போலந்து நாட்டில் தங்கப்பதக்கம் வென்ற மதுரை சிறுவன் - சு.வெங்கடேசன் எம்.பி., பெருமிதம்!

போலந்து நாட்டில் நடைபெற்ற சர்வதேச அறிவியல் கண்டுபிடிப்பு கண்காட்சியில் ஹைட்ரஜன் எரிபொருள் செல் கண்டுபிடிப்புக்காக தங்கப் பதக்கம் பெற்றுள்ள மதுரை சிறுவன் அகிலேஷூக்கு மதுரை நாடாளுமன்ற உறுப்பினர் சு.வெங்கடேசன் பாராட்டுகள் தெரிவித்துள்ளார்.

மதுரை: அண்மையில் போலாந்து நாட்டில் சர்வதேச அளவில் புதிய கண்டுபிடிப்புகளை ஊக்குவிக்கும் விதமாக கண்டுபிடிப்பாளர்களையும் அவர்களின் கண்டுபிடிப்புகளையும் அங்கீகரிக்கும் விதமாகப் பாராட்டு நிகழ்ச்சி ஒன்று நடைபெற்றது. இதில் புதிய அறிவியல் கண்டுபிடிப்புகளுக்காக பல்வேறு நாடுகளைச் சேர்ந்த அறிவியலாளர்களும் சென்றிருந்தனர். அப்போது, நமது தமிழ்நாட்டில் மதுரையைச் சேர்ந்த 12 வயது சிறுவனும் அதில் கலந்து கொண்டு அவரின் கண்டுபிடிப்புக்காக தங்கப்பதக்கத்தையும், 2 சிறப்புப்பரிசுகளையும் பெற்று தமிழ்நாட்டிற்கும் இந்தியாவிற்கும் பெருமை சேர்ந்துள்ளார்.

சர்வதேச அறிவியல் கண்டுபிடிப்பு கண்காட்சி தங்கப்பதக்கம் வென்ற மதுரை சிறுவன்

தங்கம் வென்ற மதுரை பள்ளி மாணவன்: சிறுவனின் கண்டுபிடிப்பையும் அதற்கு சர்வதேச அளவில் கிடைத்த வெகுமதியையும் பாராட்டும் விதமாக, மதுரை எம்.பி., சு.வெங்கடேசன் இன்று (ஏப்.5) செய்திக்குறிப்பு ஒன்றை வெளியிட்டுள்ளார்.

அந்த செய்திக்குறிப்பில் கூறியிருப்பதாவது, 'மாணவன் அகிலேஷ் மதுரை விகாசா பள்ளியில் 7ஆம் வகுப்பு படிக்கிறார். கடந்த 2021இல் போலந்தில் நடைபெற்ற International Warsaw invention showஇல் பங்கேற்று தனது Hydrogen fuel cell For motorized vehicle கண்டுபிடிப்பிற்காக தங்கப்பதக்கத்தையும், 2 சிறப்பு விருதுகளையும் வென்று மகத்தான சாதனைப்படைத்துள்ளார். ருமேனியாவின் சிறப்பு விருது ஒன்றினையும் வென்று தந்திருக்கிறார், நாட்டிற்கு.

தனி செயற்கைக்கோள்:மேலும், இந்தியன் புக் ஆஃப் ரெக்கார்ட்ஸில் வெறும் 25 நொடிகளில் 51 சர்வதேச ராக்கெட்டுகளின் பெயரினைக் கூறி சாதனைப் படைத்துள்ளார். அது தற்போது இன்டர்நேஷனல் புக் ரெக்கார்ட்ஸுக்கும் தேர்வாகியுள்ளது.

மேலும், தனியாக செயற்கைக்கோள் ஒன்றினையும் செய்து அதனை வெற்றிகரமாக முடித்திருக்கிறார். அதுநிச்சயம் அவனது கனவுகளை விண்ணில் ஏற்றிச்செல்லும். நான்காம் வகுப்பில் இருந்து தான் கொண்ட விண்வெளி அறிவின் காரணமாக மிகச்சிறு வயதில் வரலாறுகளை நிகழ்த்திக்கொண்டிருக்கிறார்.

மதுரையின் அறிவுக்குழந்தைக்கு எல்லா வகையிலும் உடன்நிற்பேன் எனக்கூறி ஊக்கப்படுத்தினேன். விண்வெளி சார்ந்த அகிலேஷின் அறிவு மேலும் விரிந்து பரவட்டும். 12 வயதில் தனது குழந்தையின் அறிவையும் தேடலையும் புரிந்து கொண்டு அதற்கான ஊக்கத்தை அளித்து வரும் அகிலேஷின் பெற்றோர்கள் R.சந்திரசேகரன் - C.தங்கமணி இருவருக்கும் எனது அன்பு வாழ்த்துகள்' என அந்தச் செய்திக்குறிப்பில் கூறியுள்ளார்.

இதையும் படிங்க: சிலம்பத்தில் சிகரம் தொடத் துடிக்கும் மதுரை சிறுவன்!