கேரளாவின் "அறுவடைத் திருநாள்" என்று அழைக்கப்படும் ஓணம் திருநாள் ஆவணி மாதத்தின் முதல் நாளன்று, “அத்தப்பூ” கோலமிட்டு கொண்டாடப்படுகிறது. தீரமும், ஈரமும் மிகுந்த மகாபலி சக்ரவர்த்தியைக் கேரள மக்கள் இன்முகத்துடன் இரு கைகூப்பி வரவேற்கும் நாளாக தொடங்கி, அடுத்தடுத்த நாள்களில் ஒருவருக்கொருவர் அன்பளிப்புகள், உணவு பரிமாறுதல் போன்றவற்றைத் தாராளமாக பகிர்ந்துகொண்டு, தங்களுக்குள் உள்ள மேம்பட்ட உறவினை மேலும் உறுதிப்படுத்திக் கொள்ளும் விழா இது.
இந்த ஆண்டு கரோனா பரவல் காரணமாக, ஓணம் கொண்டாட்டங்களை சற்று ஆடம்பரமிழக்கச் செய்தாலும், கோயில்களில் சிறப்பு பூஜைகளுடன் மகிழ்வுடன் திருவோணத்தை இன்று (ஆகஸ்ட் 31) கொண்டாடுகின்றனர். இந்நிலையில், ஓணம் திருநாளுக்கு பிரதமர் நரேந்திர மோடி, குடியரசுத் தலைவர் ராம் நாத் கோவிந்த், துணை குடியரசுத் தலைவர் வெங்கையா நாயுடு உள்ளிட்டோர் வாழ்த்து தெரிவித்துள்ளனர்.
ஓணம் திருநாளைக் கொண்டாடுபவர்களுக்கு பிரதமர் மோடி தனது ட்விட்டர் பக்கத்தில் வாழ்த்துகளை தெரிவித்துள்ளார். அதில், “ஓணம் திருநாள் வாழ்த்துகள். நல்லிணக்கத்தைக் கொண்டாடும் இந்த பண்டிகை தனித்துவமானது. மேலும், இவ்விழா கடினமாக உழைக்கும் விவசாயிகளுக்கு நன்றி தெரிவிப்பதற்கான சந்தர்ப்பமாகும். அனைவருக்கும் ஆரோக்கியமும், மகிழ்ச்சியும் ஆசீர்வதிக்கப்படட்டும்” எனக் குறிப்பிடப்பட்டிருந்தது.