ஆங்கிலேயர்களை எதிர்த்து முதன்முதலில் வீர வாள் உயர்த்தியவர் பூலித்தேவர் - வைகோ புகழஞ்சலி

ஜிப்ரால்டர் கோட்டையைப் போல வாசுதேவநல்லூரில் கோட்டை எழுப்பினார். மருதநாயகம் எனும் கம்மாந்தான் கான்சாகிப் பெரும் படையோடு வாசுதேவநல்லூரைத் தாக்கியபோது, அடுத்தடுத்து வெடிகுண்டுகளை வெள்ளையர் படை வீசியபோதும், இரண்டு மாதங்கள் நடைபெற்ற யுத்தத்தில் கான்சாகிப் தோற்று ஓடினான்.

1760 ஜனவரி 28இல் கான்சாகிப் தோல்வி அடைந்த செய்தி சென்னைக்குச் சென்றது. வெட்டப்பட்ட கும்பனி தளபதிகளின் தலைகள் வாசுதேவநல்லூர் கோட்டை வாயிலில் தோரணமாகக் கட்டித் தொங்கவிடப் பட்டன.

தேவேந்திரகுல வேளாளர் சமூகத்தில் பிறந்த பெரிய காலடியையும், வெண்ணிக் காலடியையும் சாதி வித்தியாசம் என்னும் எண்ணத்திற்கே இடம் தராமல் தன் சகோதரர்களாய் அரவணைத்தார் பூலித்தேவர். வயிற்றில் வெட்டுப்பட்டு, குடல் சரிந்த நிலையிலும் தலைப்பாகையினால் வயிற்றைக் கட்டிக் கொண்டு போர் புரிந்தவன் வீராதி வீரன் வெண்ணிக் காலாடி.

அருந்ததியர் குலத்தில் பிறந்த வீராதி வீரன் ஒண்டி வீரன், வெள்ளைப் பட்டாளம் இருந்த இடத்திற்கு நள்ளிரவில் சென்று, அப்படைத்தலைவனின் வாளையும், குதிரையையும் கைப்பற்றி நெல்கட்டும் செவலுக்குத் திரும்பியபோது அவன் உள்ளங் கை துளையிடப்பட்டு இரத்தம் கொட்டும் நிலையில், மகனே என்று சொல்லி கட்டி அணைத்தார் பூலித்தேவர்.

தோல்வி முகம் காணாமல் தனிக்கொடி ஏற்றிய தமிழன்

1755 கர்னல் ஹெரானைத் தோற்கடித்தது முதல் 1767 வரை 12 ஆண்டுகள் பரங்கியர் படையை எதிர்த்து தலைதாழாமல், தோல்வி முகம் காணாமல் தனிக்கொடி ஏற்றி தனது அரசை அமைத்த முதல் தமிழன் வீரவேந்தன் பூலித்தேவன் ஆவார்.

பூலித்தேவர் எண்ணற்ற ஆலயங்களுக்கு மண்டபங்கள் கட்டிக் கொடுத்தார். சுனைகள் வெட்டி வைத்தார். கரிவலம்வந்தநல்லூரில் பால்வண்ணநாதர் கோயிலில் மடைப்பள்ளியும், முன் மண்டபமும் கட்டினார். வாசுதேவநல்லூர் கோயில் முன் மண்டபத்தில் பூலித்தேவர் சிலை உள்ளது. இதனை பூதத்தான் சிலை என்பர்.

மீனாட்சி அம்மன் கோயிலுக்கு ஏராளமான தங்க நகைகளையும் வாகனங்களையும் வழங்கியவர் பூலித்தேவர். சீவலப்பேரி அருகே முஸ்லிம்கள் துன்புறுத்தப்பட்ட போது அங்கு சென்று அவர்களைப் பாதுகாத்தவர் பூலித்தேவர். சங்கரன் கோயில் ஆலயத்திற்குள் சென்ற அவர், வெளியே வரவே இல்லை. அவரது மறைவு இன்றுவரை மர்மமாகவே உள்ளது.

இந்தியாவிலேயே வெள்ளையர் படைகளை எதிர்த்து முதன் முதலில் வீர வாள் உயர்த்தி வெற்றி வாகை சூடிய புகழ் மன்னர்தான் பூலித்தேவர். அதனால்தான் 1984 இல் சட்டமன்றப் பொதுத் தேர்தலில் சங்கரன்கோவில் சுவாமி சன்னதிக்கு எதிரே நடைபெற்ற பிரம்மாண்ட திமுக தேர்தல் பிரச்சாரக் கூட்டத்தில் நெற்கட்டும் செவல் மன்னர் பூலித்தேவருக்கு டாக்டர் கலைஞர் கோட்டை எழுப்ப வேண்டும் என்று முதன் முதலில் முழங்கியவன் அடியேன்தான்.

மாமன்னர் பூலித்தேவருக்கு சிலை

அதன் பின்னர் 1991 ஆம் ஆண்டில் முருகன் கோயில் அமைந்த கழுகுமலைக்குத் தெற்கே சிதம்பராபுரம் கிராமச் சாலை மருங்கில் நானும், என் தம்பி வை.ரவிச்சந்திரனும் எங்கள் சொந்தச் செலவில் சிறிய மண்டபம் ஒன்றைக் கட்டி, அதனுள் இந்தியாவிலேயே பரங்கியரை எதிர்த்து முதலில் வாள் உயர்த்திய நெற்கட்டும் செவல் மன்னர் பூலித்தேவர் அவர்களுக்கு சிலையை நிறுவினோம்.

1991 நவம்பர் 13-ம் தேதி முன்னிரவில் பல்லாயிரக்கணக்கான மக்கள் திரண்டிருக்க திராவிட முன்னேற்றக் கழகத்தின் முன்னணித் தலைவர்களை அழைத்துச் சென்று மன்னர் பூலித்தேவர் சிலையை திறந்து வைத்த பெருமிதமும் மகிழ்ச்சியும் என் மனதில் நிலைகொண்டுள்ளன. எனவே 311 ஆவது பிறந்த நாளில் மன்னர் பூலித்தேவரின் புகழ் திக்கெட்டும் பரவுக!” என புகழஞ்சலி சூட்டியுள்ளார்.