சென்னை:2024-25 ஆம் நிதியாண்டுக்கான வேளாண் நிதிநிலை அறிக்கையை வேளாண் துறை அமைச்சர் எம்.ஆர்.கே.பன்னீர்செல்வம் இன்று (பிப்.20) தாக்கல் செய்துள்ள நிலையில், மொத்த பட்ஜெட் மதிப்பீடு ரூ.42,281 கோடி என அறிவிக்கப்பட்டுள்ளது.
- வேளாண் பட்ஜெட்களின் வளர்ச்சி நடவடிக்கையாக கடந்த 3 ஆண்டுகளில் பாசனம் பெற்ற நிலப்பரப்பு 95 லட்சத்து 39 ஆயிரம் ஏக்கராக அதிகரித்துள்ளதாக கூறப்பட்டுள்ளது.
- தென் மாவட்டங்களில் டிசம்பர் மழையால் ஏற்பட்ட பயிர்ச்சேதத்திற்காக 208 கோடியே 20 லட்ச ரூபாய் இழப்பீடாக 2 லட்சத்து 74 ஆயிரம் விவசாயிகளுக்கு விரைவில் வழங்கப்படும் என வேளாண் துறை அமைச்சர் அறிவித்துள்ளார்.
- மண்வளத்தை பெருக்குவதற்கான ‘மண்ணுயிர் காத்து மன்னுயிர் காப்போம்’ என்ற புதிய திட்டம் அறிவிக்கப்பட்டுள்ளது.
- சர்க்கரை ஆலைகளுக்கு கரும்பு வழங்கும் விவசாயிகளுக்கு சிறப்பு ஊக்கத் தொகையாக டன் ஒன்றுக்கு 215 ரூபாய் வழங்கப்படும்.
- ரசாயன உரங்கள் பயன்பாட்டை குறைத்து மண்வளம் காக்கவும், களர், அமில நிலங்களை சீர்படுத்தவும் வேளாண் பட்ஜெட்டில் 6 கோடி ரூபாய் ஒதுக்கீடு செய்யப்பட்டுள்ளதாக வேளாண் துறை அமைச்சர் தகவல்.
- ஆடா தொடா, நொச்சி போன்ற உயிரி பூச்சிக் கொல்லிகளை வளர்க்கவும், வேளாண் காடுகள் திட்டம் மூலம் விவசாயிகளுக்கு 10 லட்சம் வேப்பங்கன்றுகள் இலவசமாக வழங்கவும் 1 கோடி ரூபாய் ஒதுக்கீடு செய்யப்பட்டுள்ளதாக அமைச்சர் எம்.ஆர்.கே.பன்னீர்செல்வம் தகவல்.
- நெல் ஜெயராமனின் மரபு சார் நெல் ரகங்களை பாதுகாக்க 50 லட்ச ரூபாய் நிதி ஒதுக்கப்பட்டு, நீரிழிவை கட்டுப்படுத்தும் சீவன் சம்பா பாரம்பரிய நெல்ரக விதைகள் விநியோகம் செய்யப்படும் என அறிவிப்பு.
- காலநிலை மாற்றத்தால் பாதிக்கப்படாத சிறப்பு வேளாண் கிராமங்களை உருவாக்க வேளாண் பட்ஜெட்டில் ரூ.1.48 கோடி ஒதுக்கீடு செய்யப்பட்டுள்ளதாக அமைச்சர் எம்.ஆர்.கே.பன்னீர்செல்வம் தகவல்.
- எண்ணெய் வித்து சாகுபடியை விரிவாக்கம் செய்ய 45 கோடி ரூபாய் நிதியும், மானாவாரி நிலங்களில் சிறுதானிய சாகுபடியை ஊக்குவிக்க 36 கோடி ரூபாய் நிதியும் ஒதுக்கீடு.
- துவரை சாகுபடியை 50 ஆயிரம் ஏக்கர் பரப்பில் பயிர் செய்யும் திட்டத்திற்காக 17 கோடியே 50 லட்ச ரூபாய் நிதி ஒதுக்கீடு.
- 15 ஆயிரத்து 280 கிராமங்களில் ஒரு கிராமம் ஒரு பயிர் திட்டம் செயல்படுத்தப்படுத்தப்பட்டு தொழில்நுட்பங்கள் மற்றும் பூச்சித் தடுப்புக்கான உதவிகள் வழங்கப்படும் என அறிவிப்பு.
- வரும் நிதியாண்டில் பயிர் காப்பீட்டு திட்டத்தை செயல்படுத்துவதற்காக ஆயிரத்து 775 கோடி ரூபாய் ஒதுக்கீடு.
- கன்னியாகுமரியில் 3 கோடியே 60 லட்ச ரூபாய் செலவில் தேனீ முனையம் அமைக்கப்பட்டு, தேனீ வளர்ப்போருக்கு உரிய பயிற்சி வழங்கப்படும் என அறிவிப்பு
- வாழைக்கான சிறப்பு திட்டம் 12 கோடியே 73 லட்ச ரூபாய் செலவில் செயல்படுத்தப்படும் எனவும், வாழை சேதத்தை தவிர்ப்பதற்காக கழிகள் மூலம் முட்டுக் கொடுக்க மானியம் கொடுக்கப்படும் என அமைச்சர் எம்.ஆர்.கே பன்னீர்செல்வம் அறிவித்துள்ளார்.