ਖੰਨਾ:ਦੀਵਾਲੀ ਤੋਂ ਪਹਿਲਾਂ ਖੰਨਾ ਪੁਲਿਸ ਨੇ ਵੱਡਾ ਧਮਾਕਾ ਕੀਤਾ ਹੈ। ਇਸ ਧਮਾਕੇ ਵਿੱਚ ਰਿਹਾਇਸ਼ੀ ਇਲਾਕਿਆਂ ਅੰਦਰ ਗੈਰ-ਕਾਨੂੰਨੀ ਢੰਗ ਨਾਲ ਬਣਾਏ ਗਏ ਪਟਾਕਿਆਂ ਦੇ ਗੁਦਾਮ ਫੜੇ ਗਏ। ਦੀਵਾਲੀ ਤੋਂ ਪਹਿਲਾਂ ਇਹੋ ਜਿਹੇ ਗੁਦਾਮਾਂ ਦਾ ਪਰਦਾਫਾਸ਼ ਕਰਨ ਲਈ ਐਸ.ਐਸ.ਪੀ ਅਮਨੀਤ ਕੌਂਡਲ ਵੱਲੋਂ ਡੀ.ਐਸ.ਪੀ ਰਾਜੇਸ਼ ਸ਼ਰਮਾ ਦੀ ਨਿਗਰਾਨੀ ਹੇਠ ਬਣਾਈ ਗਈ ਵਿਸ਼ੇਸ਼ ਟੀਮ ਨੇ ਦੋਵੇਂ ਗੁਦਾਮਾਂ ਨੂੰ ਟਰੇਸ ਕੀਤਾ। ਸਪੈਸ਼ਲ ਬ੍ਰਾਂਚ, ਸਿਟੀ ਥਾਣਾ 2 ਅਤੇ ਸਦਰ ਥਾਣਾ ਦੀ ਸਾਂਝੀ ਕਾਰਵਾਈ ਦੌਰਾਨ ਪੁਲਿਸ ਨੂੰ ਸਫ਼ਲਤਾ ਮਿਲੀ। ਦੋਵੇਂ ਗੁਦਾਮਾਂ 'ਚ ਬਾਰੂਦ ਦਾ ਸਟਾਕ ਰੱਖਿਆ ਹੋਇਆ ਸੀ। ਕਰਿਆਨੇ ਅਤੇ ਕੋਲੇ ਦੇ ਕਾਰੋਬਾਰ ਦੀ ਆੜ ਵਿੱਚ ਇਹ ਧੰਦਾ ਚੱਲ ਰਿਹਾ ਸੀ। ਮੁਲਜ਼ਮਾਂ ਨੂੰ ਮੌਕੇ ’ਤੇ ਹੀ ਕਾਬੂ ਕਰ ਲਿਆ ਗਿਆ।
ਪਹਿਲੇ ਗੁਦਾਮ 'ਤੇ ਕੀਤੀ ਕਾਰਵਾਈ:ਪਹਿਲਾ ਕਾਰਵਾਈ ਦੌਰਾਨ ਪੁਲਿਸ ਨੇ ਸ਼ਹਿਰ ਦੇ ਮਲੇਰਕੋਟਲਾ ਰੋਡ ’ਤੇ ਚੌਧਰੀ ਪੈਟਰੋਲ ਪੰਪ ਦੇ ਸਾਹਮਣੇ ਗਲੀ ਵਿੱਚ ਇੱਕ ਵੱਡਾ ਗੁਦਾਮ ਫੜਿਆ ਗਿਆ। ਇੱਥੇ ਡੀਐਸਪੀ ਰਾਜੇਸ਼ ਸ਼ਰਮਾ, ਸਪੈਸ਼ਲ ਬਰਾਂਚ ਇੰਚਾਰਜ ਜਰਨੈਲ ਸਿੰਘ ਅਤੇ ਸਦਰ ਥਾਣੇ ਦੇ ਐਸਐਚਓ ਹਰਦੀਪ ਸਿੰਘ ਨੇ ਸਾਂਝੇ ਤੌਰ ’ਤੇ ਛਾਪੇਮਾਰੀ ਕੀਤੀ। ਕੋਲੇ ਅਤੇ ਲੱਕੜ ਦੇ ਗੋਦਾਮ ਦੇ ਪਿੱਛੇ ਪਟਾਕਿਆਂ ਦਾ ਭੰਡਾਰ ਸੀ। ਪਟਾਕੇ 4 ਤੋਂ 5 ਟਰੱਕਾਂ ਵਿੱਚ ਲਿਆ ਕੇ ਇੱਥੇ ਸਟੋਰ ਕੀਤੇ ਗਏ। ਪੁਲਿਸ ਨੇ ਉਨ੍ਹਾਂ ਨੂੰ ਕਬਜ਼ੇ 'ਚ ਲੈ ਕੇ ਜਾਂਚ ਸ਼ੁਰੂ ਕਰ ਦਿੱਤੀ ਹੈ। ਗੁਦਾਮ ਦੇ ਮਾਲਕ ਯੋਗੇਸ਼ ਕੁਮਾਰ ਵਾਸੀ ਬੈਂਕ ਕਲੋਨੀ ਖੰਨਾ ਨੂੰ ਮੌਕੇ ’ਤੇ ਹੀ ਕਾਬੂ ਕਰ ਲਿਆ।