ਹੈਦਰਾਬਾਦ ਡੈਸਕ: ਇੰਗਲੈਂਡ ਨੂੰ ਕ੍ਰਿਕਟ ਦਾ ਪਿਤਾਮਾ ਮੰਨਿਆ ਜਾਂਦਾ ਹੈ ਅਤੇ ਕ੍ਰਿਕਟ ਨੂੰ ਦੁਨੀਆ 'ਚ ਮਸ਼ਹੂਰ ਕਰਨ ਦਾ ਸਿਹਰਾ ਵੀ ਇੰਗਲੈਂਡ ਦੀ ਕ੍ਰਿਕਟ ਟੀਮ (England cricket team) ਨੂੰ ਜਾਂਦਾ ਹੈ। ਪਰ ਇੰਗਲੈਂਡ ਟੀਮ ਇਕਲੌਤੀ ਟੀਮ ਸੀ ਜਿਸ ਨੇ 2015 ਤੋਂ ਪਹਿਲਾਂ ਇੱਕ ਵੀ ਵਨਡੇ ਵਿਸ਼ਵ ਕੱਪ ਦਾ ਖਿਤਾਬ ਨਹੀਂ ਜਿੱਤਿਆ ਸੀ। ਇੰਗਲੈਂਡ ਦੀ ਟੀਮ ਨੇ ਸਾਲ 2019 ਵਿੱਚ ਨਿਊਜ਼ੀਲੈਂਡ ਨੂੰ ਹਰਾ ਕੇ ਆਪਣਾ ਪਹਿਲਾ ਵਿਸ਼ਵ ਕੱਪ ਖਿਤਾਬ ਜਿੱਤਿਆ। ਇੰਗਲੈਂਡ ਦੀ ਟੀਮ ਹੁਣ 5 ਅਕਤੂਬਰ ਤੋਂ ਭਾਰਤ ਵਿੱਚ ਸ਼ੁਰੂ ਹੋਣ ਵਾਲੇ ਵਿਸ਼ਵ ਕੱਪ 2023 ਵਿੱਚ ਡਿਫੈਂਡਿੰਗ ਚੈਂਪੀਅਨ ਵਜੋਂ ਦਾਖ਼ਲ ਹੋਣ ਜਾ ਰਹੀ ਹੈ।
ਇੰਗਲੈਂਡ ਦੀ ਟੀਮ ਨੂੰ ਵਨਡੇ ਫਾਰਮੈਟ 'ਚ ਮਜ਼ਬੂਤ ਟੀਮ ਮੰਨਿਆ ਜਾਂਦਾ ਹੈ। ਇੰਗਲਿਸ਼ ਬੱਲੇਬਾਜ਼ਾਂ ਦੇ ਨਾਂ ਤੋਂ ਗੇਂਦਬਾਜ਼ ਬਹੁਤ ਡਰਦੇ ਹਨ। ਵਿਸ਼ਵ ਕੱਪ 2023 ਦੇ ਪਹਿਲੇ ਹੀ ਮੈਚ 'ਚ ਇੰਗਲੈਂਡ ਦਾ ਸਾਹਮਣਾ 5 ਅਕਤੂਬਰ ਨੂੰ ਅਹਿਮਦਾਬਾਦ ਦੇ ਨਰਿੰਦਰ ਮੋਦੀ ਸਟੇਡੀਅਮ 'ਚ ਨਿਊਜ਼ੀਲੈਂਡ ਨਾਲ ਹੋਵੇਗਾ। ਇੰਗਲੈਂਡ ਦੇ ਬੱਲੇਬਾਜ਼ ਅਤੇ ਗੇਂਦਬਾਜ਼ ਇਸ ਮੈਦਾਨ 'ਤੇ ਤਬਾਹੀ ਮਚਾ ਸਕਦੇ ਹਨ। ਇਸ ਲਈ ਅੱਜ ਅਸੀਂ ਤੁਹਾਨੂੰ ਇੰਗਲੈਂਡ ਟੀਮ ਦੀ ਤਾਕਤ ਅਤੇ ਕਮਜ਼ੋਰੀਆਂ ਦੇ ਨਾਲ-ਨਾਲ ਕੁਝ ਜ਼ਰੂਰੀ ਗੱਲਾਂ ਬਾਰੇ ਦੱਸਦੇ ਹਾਂ।
ਇੰਗਲੈਂਡ ਟੀਮ ਦੀ ਤਾਕਤ:ਇੰਗਲੈਂਡ ਦੀ ਤਾਕਤ ਉਨ੍ਹਾਂ ਦੀ ਬੱਲੇਬਾਜ਼ੀ ਹੈ। ਕੋਚ ਮੈਥਿਊ ਮੋਟ ਦੀ ਅਗਵਾਈ 'ਚ ਇਸ ਟੀਮ ਦੇ ਬੱਲੇਬਾਜ਼ਾਂ ਨੇ ਪਿਛਲੇ ਕੁਝ ਸਾਲਾਂ 'ਚ ਤੂਫਾਨੀ ਬੱਲੇਬਾਜ਼ੀ ਕੀਤੀ ਹੈ। ਟੀਮ ਵਿੱਚ ਮੋਈਨ ਅਲੀ, ਜੌਨੀ ਬੇਅਰਸਟੋ, ਜੋਸ ਬਟਲਰ ਅਤੇ ਲਿਆਮ ਲਿਵਿੰਗਸਟੋਨ ਵਰਗੇ ਧਮਾਕੇਦਾਰ ਬੱਲੇਬਾਜ਼ ਸ਼ਾਮਲ ਹਨ। ਜੌਨੀ ਬੇਅਰਸਟੋ ਸਿਖਰਲੇ ਕ੍ਰਮ ਵਿੱਚ ਕਿਸੇ ਵੀ ਗੇਂਦਬਾਜ਼ੀ ਕ੍ਰਮ ਨੂੰ ਤਬਾਹ ਕਰ ਸਕਦਾ ਹੈ, ਜੋਅ ਰੂਟ ਅਤੇ ਹੈਰੀ ਬਰੂਕ ਮੱਧਕ੍ਰਮ ਵਿੱਚ ਪਾਰੀ ਨੂੰ ਅੱਗੇ ਲਿਜਾਣ ਲਈ ਕੰਮ ਕਰਨਗੇ। ਇੰਗਲੈਂਡ ਨੂੰ ਆਪਣੇ ਆਲਰਾਊਂਡਰ ਖਿਡਾਰੀਆਂ ਤੋਂ ਵੀ ਵੱਡੀਆਂ ਉਮੀਦਾਂ ਹੋਣਗੀਆਂ। ਇਸ ਟੀਮ ਕੋਲ ਲਿਆਮ ਲਿਵਿੰਗਸਟੋਨ, ਸੈਮ ਕੁਰਾਨ ਅਤੇ ਬੇਨ ਸਟੋਕਸ ਵਰਗੇ ਸ਼ਾਨਦਾਰ ਆਲਰਾਊਂਡਰ ਹਨ, ਜੋ ਬੱਲੇ ਅਤੇ ਗੇਂਦ ਦੋਵਾਂ ਨਾਲ ਤਬਾਹੀ ਮਚਾ ਸਕਦੇ ਹਨ।
ਇੰਗਲੈਂਡ ਟੀਮ ਦੀ ਕਮਜ਼ੋਰੀ:ਇੰਗਲੈਂਡ ਦੇ ਬੱਲੇਬਾਜ਼ ਤੇਜ਼ ਅਤੇ ਉੱਚ ਰਨ ਰੇਟ 'ਤੇ ਦੌੜਾਂ ਬਣਾਉਣ ਦੀ ਕੋਸ਼ਿਸ਼ ਕਰਦੇ ਹਨ ਅਤੇ ਇਸ ਚੱਕਰ ਵਿੱਚ ਉਹ ਆਪਣੀਆਂ ਵਿਕਟਾਂ ਜਲਦੀ ਗੁਆ ਦਿੰਦੇ ਹਨ। ਇੰਗਲੈਂਡ ਦੇ ਬੱਲੇਬਾਜ਼ਾਂ ਦੀ ਅਕਰਾਮਕਤਾ ਹੀ ਉਨ੍ਹਾਂ ਉੱਪਰ ਭਾਰੀ ਪੈ ਜਾਦੀ ਹੈ। ਉਹ ਭਾਰਤੀ ਪਿੱਚਾਂ 'ਤੇ ਸਪਿਨ ਗੇਂਦਬਾਜ਼ਾਂ ਨੂੰ ਖੇਡਣ 'ਚ ਅਸਫਲ ਸਾਬਤ ਹੁੰਦੇ ਹਨ। ਅਜਿਹੇ 'ਚ ਟਰਨਿੰਗ ਅਤੇ ਬਾਊਂਸੀ ਗੇਂਦਾਂ ਉਨ੍ਹਾਂ ਲਈ ਖਤਰਨਾਕ ਸਾਬਤ ਹੋ ਸਕਦੀਆਂ ਹਨ। ਇੰਗਲੈਂਡ ਦੀ ਟੀਮ ਕੋਲ ਆਦਿਲ ਰਾਸ਼ਿਦ, ਮੋਇਨ ਅਲੀ ਅਤੇ ਲਿਆਮ ਲਿਵਿੰਗਸਟੋਨ ਦੇ ਰੂਪ 'ਚ ਸਪਿਨ ਗੇਂਦਬਾਜ਼ੀ ਦੇ ਤਿੰਨ ਵਿਕਲਪ ਹਨ। ਇਨ੍ਹਾਂ 'ਚੋਂ ਆਦਿਲ ਰਾਸ਼ਿਦ ਟੀਮ 'ਚ ਇਕਲੌਤਾ ਮਾਹਿਰ ਸਪਿਨਰ ਹੈ। ਅਜਿਹੇ 'ਚ ਟੀਮ ਨੂੰ ਭਾਰਤੀ ਪਿੱਚਾਂ 'ਤੇ ਇਕ ਹੋਰ ਮਾਹਿਰ ਸਪਿਨਰ ਦੀ ਕਮੀ ਦਾ ਸਾਹਮਣਾ ਕਰਨਾ ਪੈ ਸਕਦਾ ਹੈ।
ਇੰਗਲੈਂਡ ਲਈ ਮੌਕਾ:ਇੰਗਲੈਂਡ ਕ੍ਰਿਕਟ ਟੀਮ ਨੇ ਇਸ ਵਿਸ਼ਵ ਕੱਪ ਲਈ ਟੀਮ ਵਿੱਚ ਨੌਜਵਾਨ ਬੱਲੇਬਾਜ਼ ਹੈਰੀ ਬਰੂਕ ਨੂੰ ਸ਼ਾਮਲ ਕੀਤਾ ਹੈ। ਉਸ ਨੇ ਹਾਲ ਦੇ ਸਮੇਂ 'ਚ ਟੀਮ ਲਈ ਸ਼ਾਨਦਾਰ ਪ੍ਰਦਰਸ਼ਨ ਕੀਤਾ ਹੈ ਅਤੇ ਕਾਫੀ ਦੌੜਾਂ ਬਣਾਈਆਂ ਹਨ। ਉਸ ਨੇ ਵਨਡੇ ਕ੍ਰਿਕਟ 'ਚ 20.50 ਦੀ ਔਸਤ ਨਾਲ ਦੌੜਾਂ ਬਣਾਈਆਂ ਹਨ, ਜਦਕਿ ਟੈਸਟ ਕ੍ਰਿਕਟ 'ਚ ਬਰੁਕ ਨੇ 62.15 ਦੀ ਔਸਤ ਨਾਲ ਦੌੜਾਂ ਬਣਾਈਆਂ ਹਨ। ਵਨਡੇ 'ਚ ਉਸ ਦੀ ਔਸਤ ਘੱਟ ਹੈ ਪਰ ਉਸ 'ਚ ਦੌੜਾਂ ਬਣਾਉਣ ਦੀ ਸਮਰੱਥਾ ਹੈ। ਉਹ ਭਾਰਤੀ ਪਿੱਚਾਂ 'ਤੇ ਆਪਣੇ ਬੱਲੇ ਨਾਲ ਤਬਾਹੀ ਮਚਾ ਸਕਦਾ ਹੈ।
ਇੰਗਲੈਂਡ ਟੀਮ ਲਈ ਖ਼ਤਰੇ ਦੀ ਘੰਟੀ:ਇੰਗਲੈਂਡ ਨੇ ਭਾਰਤ 'ਚ ਵਨਡੇ ਫਾਰਮੈਟ 'ਚ ਕਾਫੀ ਨਿਰਾਸ਼ਾਜਨਕ ਪ੍ਰਦਰਸ਼ਨ ਕੀਤਾ ਹੈ। ਇੰਗਲੈਂਡ ਨੇ ਭਾਰਤ 'ਚ ਖੇਡੇ ਗਏ 66 ਮੈਚਾਂ 'ਚੋਂ ਸਿਰਫ 26 ਹੀ ਜਿੱਤੇ ਹਨ। ਇਸ ਦੌਰਾਨ ਇੰਗਲੈਂਡ ਦੀ ਜਿੱਤ ਦਾ ਪ੍ਰਤੀਸ਼ਤ ਸਿਰਫ 39.39 ਰਿਹਾ ਹੈ। ਇੰਗਲੈਂਡ ਦੀ ਟੀਮ ਦੇ ਇਸ ਪ੍ਰਦਰਸ਼ਨ ਦਾ ਮੁੱਖ ਕਾਰਨ ਭਾਰਤੀ ਪਿੱਚਾਂ 'ਤੇ ਸਪਿਨਰਾਂ ਦੇ ਖਿਲਾਫ ਉਸ ਦੇ ਬੱਲੇਬਾਜ਼ਾਂ ਦੀ ਅਸਫਲਤਾ ਹੈ। ਇਸ ਤੋਂ ਇਲਾਵਾ ਆਦਿਲ ਰਾਸ਼ਿਦ ਤੋਂ ਇਲਾਵਾ ਕਿਸੇ ਹੋਰ ਸਪਿਨਰ ਦੀ ਗੈਰ-ਮੌਜੂਦਗੀ ਵੀ ਉਨ੍ਹਾਂ ਲਈ ਖ਼ਤਰਾ ਸਾਬਤ ਹੋ ਸਕਦੀ ਹੈ।
ਵਿਸ਼ਵ ਕੱਪ ਲਈ ਇੰਗਲੈਂਡ ਦੀ ਟੀਮ: ਜੋਸ ਬਟਲਰ (ਕਪਤਾਨ), ਮੋਈਨ ਅਲੀ, ਗੁਸ ਐਟਕਿੰਸਨ, ਜੌਨੀ ਬੇਅਰਸਟੋ, ਜੋ ਰੂਟ, ਲਿਆਮ ਲਿਵਿੰਗਸਟੋਨ, ਡੇਵਿਡ ਮਲਾਨ, ਆਦਿਲ ਰਾਸ਼ਿਦ, ਸੈਮ ਕੁਰਾਨ, ਹੈਰੀ ਬਰੂਕ, ਬੇਨ ਸਟੋਕਸ, ਰੀਸ ਟੋਪਲੇ, ਡੇਵਿਡ ਵਿਲੀ, ਮਾਰਕ ਵੁੱਡ, ਕ੍ਰਿਸ ਵੋਕਸ।
