କୋଟିପତି ରାୟଗଡା ଡିଏଫଓ ଚାକିରିରୁ ନିଲମ୍ବିତ

ଆୟ ବହିର୍ଭୂତ ସମ୍ପତ୍ତି ଠୁଳ ଅଭିଯୋଗରେ ଚାକିରିରୁ ନିଲମ୍ବିତ ହେଲେ ରାୟଗଡା ବନଖଣ୍ଡ ଅଧିକାରୀ । ଅଧିକ ପଢନ୍ତୁ

ରାୟଗଡା: ଡିଏଫଓଙ୍କୁ ମହଙ୍ଗା ପଡିଲା କୋଟି କୋଟି ଟଙ୍କା ସମ୍ପତ୍ତିର ମାଲିକ ହେବା । ଗିରଫ ପରେ ଚାକିରିରୁ ନିଲମ୍ବିତ ହେଲେ ରାୟଗଡା ବନଖଣ୍ଡ ଅଧିକାରୀ ବିଜୟ କୁମାର ପରିଡ଼ା । ରାଜ୍ୟ ସରକାରଙ୍କ ଜଙ୍ଗଲ, ପରିବେଶ ଓ ଜଳବାୟୁ ପରିବର୍ତ୍ତନ ବିଭାଗ ଏହି ନିଲମ୍ବନ ଆଦେଶ ଜାରି କରିଛନ୍ତି । ଆୟ ବହିର୍ଭୂତ ସମ୍ପତ୍ତି ଠୁଳ ଅଭିଯୋଗରେ ଅଗଷ୍ଟ 24 ତାରିଖରେ ଭିଜିଲାନ୍ସ ବିଭାଗ ଏକକାଳୀନ ଭାବେ 7ଟି ସ୍ଥାନରେ ଚଢାଉ କରିଥିଲା । ଏହାପରେ ଚଢାଉ ସ୍ଥାନରୁ କୋଟି କୋଟି ଟଙ୍କା ଜବତ ହୋଇଥିଲା ।

ଆୟର 206 ଗୁଣା ଅଧିକ ସମ୍ପତ୍ତି ଠାବ ହୋଇଥିବା ବେଳେ ଏତେ ଟଙ୍କା କେଉଁ ଆଣିଲେ ବୋଲି ପ୍ରଶ୍ନ କରାଯିବାରୁ ସଠିକ୍ ହିସାବ ଦେଇ ନପାରି ଗିରଫ ହୋଇଥିଲେ ରାୟଗଡା ଡିଏଫଓ । ଏହାପରେ ତାଙ୍କୁ ଗିରଫ କରାଯାଇ ଭୁବନେଶ୍ଵର ସ୍ଵତନ୍ତ୍ର ଭିଜିଲାନ୍ସ କୋର୍ଟକୁ ଚାଲାଣ କରାଯାଇଥିଲା । ସରକାରୀ ନିୟମ ଅନୁସାରେ ଜେଲରେ 48 ଘଣ୍ଟାରୁ ଅଧିକ ସମୟ ଧରି ରହିଥିବାରୁ ତାଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିଛି ଜଙ୍ଗଲ, ପରିବେଶ ଓ ଜଳବାୟୁ ପରିବର୍ତ୍ତନ ବିଭାଗ । ତାଙ୍କର ନିଲମ୍ବନ ଆଦେଶ ନଉଠିବା ଯାଏଁ କୋରାପୁଟ ଆରସିସିଏଫଙ୍କ ବିନା ଅନୁମତିରେ ସେ ହେଡକ୍ବାର୍ଟର ଛାଡି ଯାଇପାରିବେ ନାହିଁ ବୋଲି ଚିଠିରେ ଉଲ୍ଲେଖ ରହିଛି । ଗତ ୨୪ ତାରିଖରେ ଆୟ ବହିର୍ଭୂତ ସମ୍ପତ୍ତି ଠୁଳ ଅଭିଯୋଗରେ ରାୟଗଡା, ଖୋର୍ଦ୍ଧା, କଟକ ଓ ଯାଜପୁରର ୭ଟି ସ୍ଥାନରେ ରେଡ କରିଥିଲା ଭିଜିଲାନ୍ସ।

ଚଢାଉ ସମୟରେ ଡିଏଫଓଙ୍କ ରାୟଗଡା ବାସଭବନରୁ 1 ଲକ୍ଷ 24 ହଜାର 600 ଟଙ୍କା ସହ 650 ଗ୍ରାମ ସୁନା ଅଳଙ୍କାର, ଗୋଟିଏ ମାରୁତି କାର, 2ଟି ମୋଟରସାଇକେଲ ଜବତ ହୋଇଥିଲା । ଏହା ସାଙ୍ଗକୁ 17 ଲକ୍ଷ 87 ହଜାର ଟଙ୍କାର ଘରକରଣା ସାମଗ୍ରୀ ଜବତ କରିଥିଲା ଭିଜିଲାନ୍ସ ବିଭାଗ । ଭୁବନେଶ୍ବର, ପୁରୀ, କଟକ ଓ ଯାଜପୁରର ପ୍ରାଇମ୍ ଲୋକେସନରେ 17ଟି ପ୍ଲଟକୁ ଠାବ କରିଥିଲା ଭିଜିଲାନ୍ସ । ତିନୋଟି ବଡ ବଡ ଅଟାଳିକା ଠାବ ହୋଇଥିଲା । ଅଗଷ୍ଟ 24 ତାରିଖ ରାତିରେ ତାଙ୍କୁ ରାୟଗଡା ସ୍ଥିତ ସରକାରୀ ବାସଭବନରୁ ଭୁବନେଶ୍ଵର ନେଇ ସେଠାରେ ପଚରାଉଚରା କରିବା ପରେ 25 ତାରିଖରେ କୋର୍ଟ ଚାଲାଣ କରିଥିଲା ଭିଜିଲାନ୍ସ ।

ଇଟିଭି ଭାରତ, ରାୟଗଡା