ନବରଙ୍ଗପୁର: 1992 ମସିହାରେ ଅବିଭକ୍ତ କୋରାପୁଟରୁ ବିଭକ୍ତ ହୋଇଥିବା 4ଟି ନୂତନ ଜିଲ୍ଲା ମଧ୍ୟରେ ଅନ୍ୟତମ ନବରଙ୍ଗପୁରକୁ ପୂରିଛି ଦୀର୍ଘ 30 ବର୍ଷ (Nabarangpur district completes 30 years) । କିନ୍ତୁ ଦୁଃଖର ବିଷୟ ତିନି ଦଶନ୍ଧି ବିତିଥିଲେ ସୁଦ୍ଧା ନବରଙ୍ଗପୁରବାସୀ ଏବେ ମଧ୍ୟ ମୌଳିକ ସେବାରୁ ବଞ୍ଚିତ । ବିକାଶ ଓ ଆଧୁନିକତାର ସ୍ବର୍ଶ ଆଜି ଯାଏଁ ମଧ୍ୟ ଏଠି ଦୃଷ୍ଟିଗୋଚର ହେଉନାହିଁ ।
ଜିଲ୍ଲା ଗଠନକୁ ପୁରିଲା 30 ବର୍ଷ: ଏବେବି ମୌଳିକ ସୁବିଧାରୁ ବଞ୍ଚିତ ନବରଙ୍ଗପୁରବାସୀ
1992 ମସିହା ଗାନ୍ଧୀ ଜୟନ୍ତୀ ଅବସରରେ ଅବିଭକ୍ତ କୋରାପୁଟକୁ ବିଭକ୍ତ କରି 4 ଟି ନୂତନ ଜିଲ୍ଲା ଗଠନ କରାଯାଇଥିଲା । ସେହିକ୍ରମରେ ନବରଙ୍ଗପୁର ଜିଲ୍ଲା 30 ବର୍ଷରେ ପଦାର୍ପଣ କରିଛି । କିନ୍ତୁ ଏବେ ମଧ୍ୟ ପ୍ରକୃତ ହିତାଧିକାରୀଙ୍କ ନିକଟରେ ସହଜରେ ପହଞ୍ଚି ପାରୁନାହିଁ ସରକାରଙ୍କ ଜନ କଲ୍ୟାଣକାରୀ ଯୋଜନା । ସହରର ଚାକଚକ୍ୟ ବଢିଛି, କିନ୍ତୁ ପାନୀୟ ଜଳ ଓ ବାଇପାସ ରାସ୍ତାର ଅଭାବ ପୂରଣ ହୋଇ ପାରିନାହିଁ । ଜିଲ୍ଲାକୁ ପୂର୍ବତନ ପ୍ରଧାନମନ୍ତ୍ରୀ, ରାଜ୍ୟପାଳ, ମୁଖ୍ୟମନ୍ତ୍ରୀ ଆସିଥିଲେ ସୁଦ୍ଧା ଜିଲ୍ଲାର ଉନ୍ନୟନ କିନ୍ତୁ ଅଟକି ରହିଛି । କୃଷି ପ୍ରଧାନ ଏହି ଜିଲ୍ଲାରେ ଜଳସେଚନ ସୁବିଧା ନଥିବା ବେଳେ ନିଯୁକ୍ତି କ୍ଷେତ୍ରରେ ମଧ୍ୟ ପଛୁଆ । ସରକାରୀ ଯୋଜନାରେ ଘର କିମ୍ବା ବାର୍ଦ୍ଧକ୍ୟ ଭତ୍ତା ଖଣ୍ଡିଏ ପାଇଁ ସରକାରୀ ଅଫିସକୁ ଧାଇଁ ଧାଇଁ ନୟାନ୍ତ ହେଲେ ମଧ୍ୟ ତାହା ପୂରଣ ହୋଇ ପାରୁନଥିବା ଜିଲ୍ଲାବାସୀ ଅଭିଯୋଗ କରିଛନ୍ତି ।
ବର୍ଷା ଦିନେ ବାଉଁଶ ପୋଲରେ ନଦୀ ପାର ହେବା ସହ ଦେଶୀ ଡ଼ଙ୍ଗାରେ ଜୀବନକୁ ବାଜି ଲଗାଇ ଜଳ ଭଣ୍ଡାର ଆରପାରିରେ ଜୀବନ ବିତାଉଛନ୍ତି ଲୋକେ । ସ୍ୱାସ୍ଥ୍ୟ ଭିତ୍ତିଭୂମି ମଧ୍ୟ ଅତି ଶୋଚନୀୟ । ରାସ୍ତା ନଥିବାରୁ ଗାଁକୁ ଆମ୍ବୁଲାନ୍ସ ଆସିପାରୁନି । ଫଳରେ ଖଟିଆରେ ବୁହାହୋଇ ରୋଗୀଙ୍କୁ ହସ୍ପିଟାଲ ଅଣାଯାଉଛି । ନିକଟରେ ଗଛ ତଳେ ଜଣେ ବୃଦ୍ଧାଙ୍କୁ ସାଲାଇନ ଦେବାର ଚିତ୍ର ଜିଲ୍ଲାର ସ୍ବାସ୍ଥ୍ୟ ସେବାର ଚିତ୍ରକୁ ପଦାରେ ପକାଇଥିଲା । ଦିନେ ଜଙ୍ଗଲବହୁଳ ଥିବା ଜିଲ୍ଲା ଆଜି ଜଙ୍ଗଲ ଶୂନ୍ୟ ହେବାକୁ ବସିଲାଣି । ପ୍ରତିବର୍ଷ କୋଟି କୋଟି ଟଙ୍କା ଖର୍ଚ୍ଚରେ ବୃକ୍ଷରୋପଣ କରାଯାଉଥିଲେ ସୁଦ୍ଧା ଆଖିଦୃଶିଆ ଜଙ୍ଗଲ ସୃଷ୍ଟି କିନ୍ତୁ ସମ୍ଭବପର ହୋଇନାହିଁ l
ମନରେଗା ଯୋଜନାରେ ଶ୍ରମିକଙ୍କୁ କର୍ମନିଯୁକ୍ତି ମିଳୁଥିଲେ ସୁଦ୍ଧା ମେସିନ ଲଗାଇ କାର୍ଯ୍ୟ କରାଯାଉଛି । ବିଭାଗୀୟ ଅଧିକାରୀଙ୍କୁ ପଚାରିଲେ ଉତ୍ତର ମିଳୁଛି ମେସିନରେ ମଧ୍ୟ କାମ ହୋଇପାରିବ । ରେଳସେବାର ପ୍ରତିଶୃତି ଆଜି ଯାଏ ପ୍ରତିଶୃତି ହିଁ ଅଟକି ରହିଛି । ଜିଲ୍ଲାର ମହାବିଦ୍ୟାଳୟକୁ 50 ବର୍ଷ ପୂର୍ତ୍ତି ହେବାକୁ ଯାଉଥିଲେ ସୁଦ୍ଧା, ତାହା ଆଜିଯାଏ ସରକାରୀ ଅନୁଷ୍ଠାନର ମାନ୍ୟତା ମଧ୍ୟ ପାଇନାହିଁ । ଜିଲ୍ଲାର ଗୋଟିଏ ଅଂଶ ଆଜି ମାଓବାଦୀଙ୍କ ଗଡ଼ ହେବାକୁ ବସିଲାଣି । ଏନେଇ ଜିଲ୍ଲା ପ୍ରଶାସନର ପ୍ରତିକ୍ରିୟା କିନ୍ତୁ ମିଳିପାରିନାହିଁ ।
ଇଟିଭି ଭାରତ, ନବରଙ୍ଗପୁର
