ମାଲକାନଗିରି:କୋମାରେ ପଡିଛି ଚିତ୍ରକୋଣ୍ଡାର ଆମ୍ବୁଲାନ୍ସ ସେବା । ଲୋକଙ୍କ ଦାବି ସତ୍ତ୍ବେ ଭାଙ୍ଗୁନି ପ୍ରଶାସନର ନିଦ। ଫଳରେ ନାହିଁନଥିବା ଅସୁବିଧାର ସମ୍ମୁଖୀନ ହେଉଛନ୍ତି ଚିତ୍ରକୋଣ୍ଡା ଅଞ୍ଚଳର ଅଧିବାସୀ।
ଗତମାସ 28 ତାରିଖରୁ ଚିତ୍ରକୋଣ୍ଡା ଉପଖଣ୍ଡ ସ୍ବାସ୍ଥ୍ୟକେନ୍ଦ୍ରର 108 ଆମ୍ବୁଲାନ୍ସ ସେବା ବନ୍ଦ ରହିଛି । ଯାହାଫଳରେ ଆମ୍ବୁଲାନ୍ସ ସେବା ପାଇବାରୁ ବଞ୍ଚିତ ହୋଇଛନ୍ତି ସ୍ଥାନୀୟ ଅଞ୍ଚଳର ହଜାର ହଜାର ଆଦିବାସୀ । ବାଧ୍ୟ ହୋଇ ରୋଗୀ ଘରୋଇ ଗାଡି ଓ ଅନ୍ୟ ସ୍ବାସ୍ଥ୍ୟକେନ୍ଦ୍ରର ଆମ୍ବୁଲାନ୍ସ ଉପରେ ନିର୍ଭର କରୁଛନ୍ତି।
ଗତ ଅକ୍ଟୋବର 28 ତାରିଖରୁ ରୋଗୀଙ୍କୁ ନେଇ ଚିତ୍ରକୋଣ୍ଡାରୁ ମାଲକାନଗିରି ଯାଉଥିବା ସମୟରେ ରାସ୍ତାରେ ଖରାପ ହୋଇପଡିଛି ଚିତ୍ରକୋଣ୍ଡା ସ୍ବାସ୍ଥ୍ୟକେନ୍ଦ୍ରର ଏକ ମାତ୍ର 108 ଆମ୍ବୁଲାନ୍ସ । ଏହା ପରଠାରୁ ଆଜି ପର୍ଯ୍ୟନ୍ତ ଉକ୍ତ 108 ଆମ୍ବୁଲାନ୍ସର ମରାମତି ହୋଇନି। ଲୋକଙ୍କ କହିବା ଅନୁସାରେ, ଚିତ୍ରକୋଣ୍ଡା ପରି ପଛୁଆ ଅଞ୍ଚଳରେ ଆମ୍ବୁଲାନ୍ସ ସେବା ନଥିବାରୁ ରୋଗୀ ନାହିଁନଥିବା ଅସୁବିଧାର ସମ୍ମୁଖୀନ ହେଉଛନ୍ତି। ଆମ୍ବୁଲାନ୍ସ ବାବଦରେ ଡାକ୍ତର କହୁଛନ୍ତି ଆମ୍ବୁଲାନ୍ସ ଖରାପକୁ ନେଇ 108ର ପରିଚାଳନା ନିର୍ଦ୍ଦେଶକ ଓ ସିଡିଏମଓଙ୍କୁ ଜଣାଇ ଦିଆଯାଇଛି।
ମାଲକାନଗିରିରୁ ଜୟନ୍ତ ତିଆଡି, ଇଟିଭି ଭାରତ
