ଭୁବନେଶ୍ବର:ଜାନୁଆରୀ 19ରୁ ରାଜ୍ୟରେ ଉପଲବ୍ଧ ହେବ କୋଭିଡ ଟୀକା । ବଛାବଛା ଡାକ୍ତରଖାନାରେ ଦିଆଯିବ କୋଭିସିଲ୍ଡ ଟିକା । ଦ୍ବିତୀୟ ଓ ତୃତୀୟ ଡୋଜ୍ ଟିକା ନେଇ ପାରିବେ ହିତାଧିକାରୀ । ରାଜ୍ୟରେ ବର୍ତ୍ତମାନ ପାଖାପାଖି 1 ଲକ୍ଷ ଡୋଜ ଟୀକା ଗଚ୍ଛିତ ହୋଇ ରହିଛି । ରାଜ୍ୟର CHC, SDH, DHH, PHC ମାନଙ୍କରେ କରାଯିବ ଟୀକାକରଣ । ଏନେଇ ସ୍ୱାସ୍ଥ୍ୟ ସଚିବ ଶାଳିନୀ ପଣ୍ଡିତ ସୂଚନା ଦେଇଛନ୍ତି।
ତେବେ ରାଜ୍ୟରେ ବର୍ତ୍ତମାନ ସୁଦ୍ଧା ପ୍ରଥମ ଡୋଜ 3କୋଟି 52 ଲକ୍ଷ 50 ହଜାର 342 ଡୋଜ ଟୀକା ନେଇଛନ୍ତି । ସେହିପରି ଦ୍ବିତୀୟ ଡୋଜ୍ 3 କୋଟି 30 ଲକ୍ଷ 979 ଜଣ ନେଇଥିବା ବେଳେ ବୁଷ୍ଟର ଡୋଜ ନେଇଛନ୍ତି 1 କୋଟି 31 ଲକ୍ଷ୍ୟ 98 ହଜାର 797 ଜଣ । ୭୫ତମ ସ୍ବାଧୀନତା ଦିବସରେ ଆଜାଦୀ କା ଅମୃତ ମହୋତ୍ସବ ପାଳନ ଅବସରରେ 75 ଦିନ ପାଇଁ ସମଗ୍ର ଦେଶରେ ପିଲାଠାରୁ ଆରମ୍ଭ କରି ବୟସ୍କ ଲୋକମାନଙ୍କୁ ମାଗଣାରେ ଟୀକାକରଣ କରାଯାଇଥିଲା । ଏହି କ୍ରମରେ ରାଜ୍ୟରେ ଅନେକ ଲୋକ ଦ୍ବିତୀୟ ଡୋଜ୍ ଏବଂ ତୃତୀୟ ଡୋଜ୍ ଟିକା ନେଇ ନାହାନ୍ତି । ବିଦେଶରେ କିଛି ଦେଶମାନଙ୍କରେ କୋରୋନା ସଂକ୍ରମଣ ବଢୁଥିବାରୁ ରାଜ୍ୟ ସରକାର ବାରମ୍ବାର କେନ୍ଦ୍ର ସରକାରଙ୍କୁ ମାଗଣା ଟୀକା ପାଇଁ ଚିଠି ଲେଖିଥିଲେ।