କେନ୍ଦ୍ରାପଡା:ମହାନଦୀରେ ବନ୍ୟା ବିଭୀଷିକା। ଚାରିଆଡେ ପାଣି । ତେବେ ଶାଖାନଦୀ ଗୁଡିକରେ ଘଳିଆ ପଡିବା କାରଣରୁ ଲୋକେ ଆତଙ୍କିତ ହୋଇଥିବା ବେଳେ ପୁନଃ ଲଘୁଚାପ ଜନିତ ବର୍ଷା ଆରମ୍ଭ ଯୋଗୁଁ ଲୋକଙ୍କ ଛାତିରେ ଛନକା ପସିଛି । ବାଲିବସ୍ତା ପକାଯାଇ ରୋକିବାକୁ ପ୍ରୟାସ କରୁଛନ୍ତି ସ୍ଥାନୀୟଲୋକେ । ଏଭଳି ଏକ ଦୃଶ୍ୟ ଦେଖିବାକୁ ମିଳିଛି କେନ୍ଦ୍ରାପଡା ଜିଲ୍ଲାରେ ।
ମହାନଦୀରେ ଭୀଷଣ ବନ୍ୟା, ଶାଖା ନଦୀ ଗୁଡିକର ଜଳସ୍ତର ବିପଦ ସଙ୍କେତ ଠାରୁ ବହୁ ଉର୍ଦ୍ଧ୍ବରେ। ମହାନଦୀ ଶାଖା ନଦୀ ପାଇକା, ଚିତ୍ରୋତ୍ପଳା,ଲୁଣା ଓ କରାଣ୍ଡିଆ ନଦୀରେ ବନ୍ୟାଜଳ ମାଡି ଆସିବା ଫଳରେ କେନ୍ଦ୍ରାପଡ଼ା ଜିଲ୍ଲାର ମୋଟ ୧୦୫ଟି ଗାଁର ୧ ଲକ୍ଷରୁ ଅଧିକ ଲୋକ ପ୍ରଭାବିତ ହୋଇଛନ୍ତି । ବିଶେଷକରି ଗରଦପୁର, ମାର୍ଶାଘାଇ, ମହାକାଳପଡ଼ା ଆଦି ବ୍ଲକରେ ଥିବା ନଦୀକୂଳ ବାସିନ୍ଦା ଆତଙ୍କିତ ହୋଇ ପଡିଛନ୍ତି। ପାଇକା ନଦୀର ମାର୍ଶାଘାଇ ବ୍ଲକ ବଟିରା ପ୍ରାଥମିକ ବିଦ୍ୟାଳୟ ଠାରେ ମଙ୍ଗଳବାର ରାତିରୁ ଘଳିଆ ପଡ଼ିଥିଲେ ହେଁ ପ୍ରଶାସନ ପହଞ୍ଚିବା ବେଳେ ୭୦% ନଦୀବନ୍ଧ ଧସି ପାଣି ଗାଁ ମୁହାଁ ହୋଇଥିବା ନେଇ ଅଭିଯୋଗ କରିଛନ୍ତି ସ୍ଥାନୀୟ ଲୋକେ । ପ୍ରଶାସନର ପହଞ୍ଚିବାରେ ବିଳମ୍ବ ହେତୁ ବଲହା,ବାଲି ପକାଇ ଘଳିଆକୁ ପୋତିବା ପାଇଁ ପ୍ରୟାସ କରାଯାଇଥିଲା ବେଳେ ବିଭାଗୀୟ ଉଚ୍ଚ ଅଧିକାରୀ ଘଟଣାସ୍ଥଳରେ ଉପସ୍ଥିତ ରହି ତଦାରଖ କରୁଛନ୍ତି।