ଆକାଶଛୁଆଁ ଦରଦାମ: ଟମାଟୋ କିଲୋ ୧୦୦, ବାଇଗଣ ୮୦

ରୋଷେଇ ଶାଳ ଉପରେ ମହଙ୍ଗା ମାଡ । ବଜାରରେ ଆକାଶ ଛୁଆଁ ପରିବା ଦର । ଆଗରୁ ଯେଉଁଠି ୧୦୦ ଟଙ୍କାରେ ପୁରା ବ୍ୟାଗ ପୁରୁଥିଲା, ଏବେ ଗୋଟିଏ ଛୋଟ ମୁଣି ପୁରିବା ମଧ୍ୟ କଷ୍ଟକର । ଫଳରେ ବଜାରକୁ ଆସିବାକୁ ଭୟଭୀତ ଗ୍ରାହକ । ଦେଖନ୍ତୁ ଏହି ରିପୋର୍ଟ

ଭବାନୀପାଟଣା: ବଜାରରେ ଆକାଶ ଛୁଆଁ ହେଉଛି ପରିବା ଦର । ସବୁ ପନିପରିବାର ଦର ପାଖାପାଖି ୭୦ ଟଙ୍କା ଉପରେ । ଯାହାକୁ ନେଇ ଚିନ୍ତାରେ ବ୍ୟବସାୟୀ ଓ ଅସନ୍ତୁଷ୍ଟ ଖାଉଟି । ବିଶେଷ କରି କଳାହାଣ୍ଡି ଜିଲ୍ଲାରେ ପରିବା ଦର ହୁହୁ ହୋଇ ବଢ଼ିବାରେ ଲାଗିଛି । ପେଟ୍ରୋଲ ଡିଜେଲ ଦର ବୃଦ୍ଧି ହେବା ଯୋଗୁଁ ଗାଡି ଭଡା ମଧ୍ୟ ବୃଦ୍ଧି ପାଇଛି, ଯେଉଁଥିରେ ପରିବା ଦର ସହ ଖାଉଟି ସାମଗ୍ରୀ ଦର ଆକାଶ ଛୁଆଁ ହେଉଥିବା ବ୍ୟବସାୟୀ କହୁଥିବାବେଳେ ଦରକୁ ଦେଖି ଗ୍ରାହକ ଅସନ୍ତୁଷ୍ଟ ।

ବର୍ତ୍ତମାନ ବଜାରରେ ଟମାଟୋ କିଲୋପ୍ରତି ୮୦ ରୁ ୧୦ ଟଙ୍କା ବିକ୍ରି ହେଉଥିବାବେଳେ ବାଇଗଣ କିଲୋ ୮୦, ଝୁଡଙ୍ଗ କିଲୋ ୮୦, ବିନ୍ସ କିଲୋ ୭୦, ବିଟା ୧୦୦, ଗାଜର ଦର କିଲୋପ୍ରତି ୮୦ରୁ ୯୦ ଟଙ୍କା ରହିଛି । ପାଞ୍ଚଶହ ଟଙ୍କାର ପରିବା ବ୍ୟାଗ ଅଧା ହେଉନଥିବା ଦେଖିବାକୁ ମିଳିଛି । କିଛି ଦିନ ପୂର୍ବେ ସ୍ୱାଭାବିକ ଦରରେ ବଜାରରେ ବିକ୍ରୟ ହେଉଥିବା ପରିବା ଏବେ ତିନିଗୁଣ ଦର ବୃଦ୍ଧି ପାଇଛି । ସ୍ଥିତି ଏମିତି ହେଲାଣି ଯେ ବଜାରକୁ ଲୋକେ ଯିବାକୁ ଭୟ କରୁଛନ୍ତି । ଏପରି ଦର ବୃଦ୍ଧି ଖାଉଟିଙ୍କୁ ବେଶ ପ୍ରଭାବିତ କରିଛି । ୧ କିଲୋ କିଣିବା ପରିବର୍ତ୍ତେ ୨୦୦ ଗ୍ରାମ କିମ୍ବା ୨୫୦ ଗ୍ରାମ ନେଇ ଘର ଚଳାଇବାକୁ ପଡୁଛି । ହଠାତ ଖାଉଟି ସାମଗ୍ରୀ ସହ ପରିବା ଦର ବୃଦ୍ଧି ହେବାରୁ ଖାଉଟିଙ୍କ ମନରେ ଉଦବେଗ ପ୍ରକାଶ ପାଇଛି ।କଳାହାଣ୍ଡିରୁ ଅଜିତ କୁମାର ସିଂ, ଇଟିଭି ଭାରତ