ଧରାବତରଣ କରିବେ ଜଗତଜନନୀ, କଳାହାଣ୍ଡିରେ ଜୋରସୋରରେ ଚାଲିଛି ପ୍ରସ୍ତୁତି

କଳାହାଣ୍ଡିରେ ଜୋରସୋରେ ଚାଲିଛି ଦୁର୍ଗାପୂଜା ପ୍ରସ୍ତୁତି। ଚଳିତ ବର୍ଷ ଦୁର୍ଗାପୂଜାରେ ବହୁ ଲୋକଙ୍କ ସମାଗମ ହେବା ନେଇ ଆଶା। ଅଧିକ ପଢନ୍ତୁ

ଭବାନୀପାଟଣା: ଜାରି ରହିଛି ନବରାତ୍ର ପୂଜା । ଆଉ ଦିନ କେଇଟା ପରେ ଧରାବତରଣ କରିବେ ଜଗତଜନନୀ ମା' ଦୁର୍ଗା । ନବରାତ୍ରକୁ ନେଇ ଚଳଚଞ୍ଚଳ ହୋଇ ଉଠିଛି ଶକ୍ତିପୀଠ । ଦଶହରାକୁ ନେଇ ଚାରିଆଡ଼େ ଆରମ୍ଭ ହେଲାଣି ଉତ୍ସବର ମାହୋଲ । ଅନ୍ୟପଟେ ପୂଜା ମଣ୍ଡପଗୁଡିକରେ ମାଆଙ୍କ ମୂର୍ତ୍ତିରେ ଶେଷ ସ୍ପର୍ଶ ଦିଆଯାଉଛି। କଳାହାଣ୍ଡି ଜିଲ୍ଲା ସମେତ ଭବାନୀପାଟଣା ସହରରେ ଦୁର୍ଗାପୂଜାକୁ ନେଇ ଜୋରଦାର ପ୍ରସ୍ତୁତି ଜାରି ରହିଛି। ସେହିପରି ସାଜସଜ୍ଜା ପାଇଁ ତୋରଣ ଉପରେ ଅଧିକ ଗୁରୁତ୍ବ ଦିଆଯାଉଛି । ଦଶହରା ସମୟରେ ସହରର ଗଳିକନ୍ଦୀ ଚିକମିକ ଆଲୁଅରେ ଝଲସି ଉଠିବ ।

ସହରର ନକଗୁଡ଼ା ଦୁର୍ଗାପୂଜା କମିଟି ପକ୍ଷରୁ ନବରାତ୍ର ପୂଜା ଆରମ୍ଭ ହୋଇଛି। ଋଷିଆର ହର୍ମିଟେଜ ମ୍ୟୁଜିୟମ ସଦୃଶ୍ୟ ତୋରଣ ଏଠାରେ ନିର୍ମାଣ କରାଯାଉଥିବା ବେଳେ ମୀନାବଜାରର ଆୟୋଜନ କରାଯାଇଛି । ସେହିପରି ଜନତା ଦୁର୍ଗାପୂଜା କମିଟି ପକ୍ଷରୁ ମଧ୍ୟ ଲୋକଙ୍କ ମନେରଞ୍ଜନ ପାଇଁ ବିଶେଷ ଧ୍ୟାନ ଦିଆଯାଇଥିବା ବେଳେ ବିଭିନ୍ନ ସାଂସ୍କୃତିକ କାର୍ଯ୍ୟକ୍ରମ ଆୟୋଜନ କରାଯିବ । ବିଶେଷ ଆକର୍ଷଣ ପାଇଁ ରାବଣ ପୋଡ଼ି ଉପରେ ଅଧିକ ଗୁରୁତ୍ବ ଦିଆଯାଇଥିବା ପୂଜା କମିଟି ସଭାପତି ପ୍ରକାଶ କରିଛନ୍ତି।

ସହରରେ ୧୧ଟି ସ୍ଥାନରେ ଦୁର୍ଗାପୂଜା ଆୟୋଜନ ହୋଇଥିବା ବେଳେ ଜିଲ୍ଲା ପ୍ରଶାସନ ପକ୍ଷରୁ ମଧ୍ୟ ବ୍ୟାପକ ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଛି । ଶାନ୍ତି ଶୃଙ୍ଖଳା ବଜାୟ ରଖିବା ପାଇଁ ପୋଲିସ ପ୍ରଶାସନ ପକ୍ଷରୁ ୧୦ ପ୍ଲାଟୁନ ପୋଲିସ ଫୋର୍ସ ମୁତୟନ କରାଯିବା ନେଇ ନିଷ୍ପତି ନିଆଯାଇଥିବା ପୋଲିସ ପ୍ରଶାସନ ପକ୍ଷରୁ ସୂଚନା ମିଳିଛି । ଚଳିତ ବର୍ଷ ଦୁର୍ଗାପୂଜାରେ ବହୁ ଲୋକଙ୍କ ସମାଗମ ହେବ ବୋଲି ଆଶା କରାଯାଉଛି । ଦଶହରା ପାଇଁ କେବଳ କଳାହାଣ୍ଡି କାହିଁକି ରାଜ୍ୟର ବିଭିନ୍ନ ଜିଲ୍ଲାରେ ଜୋରସୋରରେ ଚାଲିଛି ପ୍ରସ୍ତୁତି । ସାଜସଜ୍ଜା ପାଇଁ ମଣ୍ଡପ ମଧ୍ୟରେ ପ୍ରତିଯୋଗୀତା ଦେଖିବାକୁ ମିଳୁଛି ।

ଆଶ୍ୱୀନ ଶୁକ୍ଳପକ୍ଷରେ ଶାରଦୀୟ ନବରାତ୍ରୀ ପୂଜା ଆରମ୍ଭ ହୋଇଥାଏ । 9 ଦିନ ଧରି ଏହି ପୂଜାର୍ଚ୍ଚନା କରାଯାଏ । ତେବେ ଚଳିତ ବର୍ଷ ଅକ୍ଟୋବର 15ରୁ ନବରାତ୍ରୀ ଆରମ୍ଭ ହୋଇଥିବା ବେଳେ 24 ଅକ୍ଟୋବରରେ ଶେଷ ହେବ । ନବରାତ୍ରର ପ୍ରଥମ ଦିନ ପ୍ରତିପଦା ତିଥିରେ ଘଟ ସ୍ଥାପନା କରିବା ସହ ମାଆ ଶୈଳପୁତ୍ରୀଙ୍କୁ ପୂଜାର୍ଚ୍ଚନା କରାଯାଇଥିଲା ।

ଇଟିଭି ଭାରତ, କଳାହାଣ୍ଡି