ମା' ବିରଜାଙ୍କ ପୀଠରେ ସାବିତ୍ରୀ ପାଳିଲେ ସଧବା ଯାଜପୁର: ଆଜି ପବିତ୍ର ସାବିତ୍ରୀ ବ୍ରତ। ସଧବା ନାରୀଙ୍କ ପାଇଁ ସ୍ୱତନ୍ତ୍ର ଦିନଟିଏ । ଏଥିପାଇଁ ଯାଜପୁରର ଅଧିଷ୍ଠାତ୍ରୀ ଦେବୀ ମାଁ ବିରଜା ମନ୍ଦିରରେ ଶ୍ରଦ୍ଧାଳୁଙ୍କ ପ୍ରବଳ ଭିଡ ଦେଖିବାକୁ ମିଳିଛି । ମା' ବିରଜା ସାବିତ୍ରୀ ବେଶକୁ ଦର୍ଶନ କରିବା ପାଇଁ ଶ୍ରଦ୍ଧାଳୁଙ୍କ ଲମ୍ବାଭିଡ ଜମିଥିଲା । ଶୃଙ୍ଖଳିତ ଦର୍ଶନ ପାଇଁ ମନ୍ଦିର ଓ ପୋଲିସ ପ୍ରଶାସନ ପକ୍ଷରୁ ବ୍ୟାପକ ବନ୍ଦୋବସ୍ତ କରାଯାଇଥିଲା । ଆଜିର ଦିନରେ ମା'ଙ୍କୁ ଦର୍ଶନ କରିବାର ସୁଯୋଗ ମିଳିଥିବାରୁ ଶ୍ରଦ୍ଧାଳୁମାନଙ୍କ ମଧ୍ୟରେ ପ୍ରବଳ ଆଗ୍ରହ ଦେଖିବାକୁ ମିଳିଛି।
ସାବିତ୍ରୀ ପାଳିଛନ୍ତି ପତିବ୍ରତା: ପବିତ୍ର ସାବିତ୍ରୀ ଅମାବାସ୍ୟା ଅବସରରେ ଚଳଚଞ୍ଚଳ ପୂରପଲ୍ଲୀ, ନଗର ସହର । ଏହି ଅବସରରେ ମାଁ ବିରଜାଙ୍କ ପୀଠରେ ବ୍ରତଧାରୀଙ୍କ ଭିଡ ଦେଖିବାକୁ ମିଳିଥିଲା । ମା' ବିରଜାଙ୍କ ସ୍ୱତନ୍ତ୍ର ନୀତିକାନ୍ତି ସମ୍ପନ୍ନ ହେବା ପରେ ସଧବା ନାରୀମାନେ ବ୍ରତ ପାଳନ କରିଥିଲେ । ସ୍ବାମୀକୁ ସମସ୍ତ ବିପଦରୁ ରକ୍ଷା କରିବା ପାଇଁ ନାରୀମାନେ ଏହି ପୂଜା ଆର୍ଚ୍ଚନା କରିଥାଆନ୍ତି । ସେଥିପାଇଁ ସକାଳୁ ମହିଳାମାନେ ନୂତନ ଶାଢ଼ି ପିନ୍ଧି, ହାତରେ ଭୋଗ ଦୀପ ନୈବେଦ୍ୟ ନେଇ ମା'ଙ୍କ ପାଖରେ ପୂଜା କରିଥିଲେ ।
ମାଁ ବିରଜାଙ୍କ ସାବିତ୍ରୀ ବେଶ:ବର୍ଷକୁ ଦୁଇଥର ମା' ବିରଜା ଭକ୍ତଙ୍କୁ ସାବିତ୍ରୀ ବେଶରେ ଦର୍ଶନ ଦେଇଥାଆନ୍ତି। ଯାହାକୁ ଦେଖିବା ପାଇଁ ଶ୍ରଦ୍ଧାଳୁଙ୍କ ମଧ୍ୟରେ ବେଶ ଉତ୍ସାହ ଦେଖିବାକୁ ମିଳିଥାଏ । ତେଣୁ ଏହି ଦିନରେ ନାରୀମାନେ ବିଭିନ୍ନ ପ୍ରକାରର ଫଳମୂଳ ଭୋଗ କରି ସ୍ୱାମୀଙ୍କ ଦୀର୍ଘ ନିରାମୟ ଜୀବନ କାମନା କରିଥାଆନ୍ତି । ଏଥିପାଇଁ ମା ବିରଜାଙ୍କ ପୀଠରେ ଆଜିର ଦିନରେ ଲମ୍ବା ଲାଇନ ପରିଲଖିତ ହୋଇଥାଏ । ପ୍ରବଳ ଖରା ଯୋଗୁଁ ଶ୍ରଦ୍ଧାଳୁଙ୍କ ଶୃଙ୍ଖଳିତ ଦର୍ଶନ ପାଇଁ ମନ୍ଦିର ପ୍ରଶାସନ ପକ୍ଷରୁ ଛାଇର ବ୍ୟବସ୍ଥା କରାଯାଇଛି । ବିଭିନ୍ନ ସ୍ୱେଚ୍ଛାସେବୀ ସଂଗଠନ ପକ୍ଷରୁ ଜଳ ଛତ୍ରର ବ୍ୟବସ୍ଥା ରହିଛି । ପୌରାଣିକ ମାନ୍ୟତା ଅନୁଯାୟୀ, ଆଜିର ଦିନରେ ମାଁଙ୍କ ପୀଠରେ ସଧବା ନାରୀମାନେ ସାବିତ୍ରୀ ବ୍ରତ ପାଇଁ ପୂଜାର୍ଚ୍ଚନା କଲେ ସ୍ବାମୀର ଆୟୁଷ ବୃଦ୍ଧି ସହ ପରିବାରର ମଙ୍ଗଳ ହୁଏ ।
ସାବିତ୍ରୀ ବ୍ରତର ମହିମା: ସାବିତ୍ରୀ ନିଜର ନିଷ୍ଠା ଓ ସତିତ୍ୱ ବଳରେ ଯମପୁରରୁ ସ୍ବାମୀ ସତ୍ୟବାନଙ୍କୁ ଫେରାଇ ଆଣିଥିଲେ । ସେ ନିଜ ସ୍ବାମୀଙ୍କ ଜୀବନ ପାଇଁ ଯମରାଜଙ୍କୁ ମଧ୍ୟ ବିବଶ କରି ଦେଇଥିଲେ । ନିଜର ତପବଳରେ ସେ ମୃତ୍ୟୁ କୋଳରେ ଚିରନିଦ୍ରାରେ ଶୋଇ ପଡିଥିବା ସ୍ବାମୀକୁ ଚିର ନିଦ୍ରାରୁ ଉଠେଇ ନୂତନ ଜୀବନ ଦେଇଥିଲେ । ସେହିପରି ସଧବା ନାରୀମାନେ ଏହି ଓଷା କଲେ ତାଙ୍କ ସ୍ବାମୀଙ୍କ ଆୟୁଷ ବଢିବା ସହ ପରିବାରେ ଶାନ୍ତି ବଜାର ରହିଥାଏ ବୋଲି ବିଶ୍ବାସ ରହିଛି ।
ଇଟିଭି ଭାରତ, ଯାଜପୁର
