ଯାଜପୁର:ଜିଲ୍ଲା ଦେଇ ଯାଇଥିବା ୫୩ ନମ୍ବର ଜାତୀୟ ରାଜପଥର ଜମି ଅଧିଗ୍ରହଣକୁ ନେଇ ଦେଖାଦେଇଛି ବିବାଦ । କଳିଙ୍ଗନଗରର ଡୁବୁରୀ ଓ ବାରାଗଡିଆ ମୌଜା ଅଞ୍ଚଳବାସୀଙ୍କୁ ଆଜି ପର୍ଯ୍ୟନ୍ତ ଉଚିତ କ୍ଷତିପୂରଣ ମିଳିନଥିବାରୁ ଏହି ଜମି ଅଧିଗ୍ରହଣକୁ ବିରୋଧ କରାଯାଇଛି ।
୫୩ ନମ୍ବର ଜାତୀୟ ରାଜପଥ ଜମି ଅଧିଗ୍ରହଣକୁ ନେଇ ବିବାଦ କଳିଙ୍ଗନଗରରେ ଜାତୀୟ ରାଜପଥ ନିର୍ମାଣ ପାଇଁ ହେଉଥିବା ଜମି ଅଧିଗ୍ରହଣକୁ ନେଇ ପ୍ରଶାସନ ଓ ଜମି କ୍ଷତିଗ୍ରସ୍ତ ମୁହାଁମୁହିଁ । ଯାଜପୁର ଜିଲ୍ଲା ଦେଇ ଯାଉଥିବା ୫୩ ନମ୍ବର ଜାତୀୟ ରାଜପଥ ପାଇଁ ଜମି ଅଧିଗ୍ରହଣ କରୁଛନ୍ତି ରାଜ୍ୟସରକାର । ଏ ନେଇ ଗତ ୨୦୦୭ ମସିହାରୁ ଏହି ଜମି ଅଧିଗ୍ରହଣ ପାଇଁ ନୋଟିସ କରିଥିଲେ ରାଜ୍ୟ ସରକାର । କିନ୍ତୁ ଦୀର୍ଘ ୧୪ ବର୍ଷ ପରେ ସରକାରଙ୍କ ପକ୍ଷରୁ ଜମି ଅଧିଗ୍ରହଣ କରିବା ପାଇଁ ନିଷ୍ପତ୍ତି ନେଇ ତରବରିଆ ଭାବେ ଦୋକାନ ଘର ଓ ବାସଗୃହ ଗୁଡିକୁ ଭାଙ୍ଗି ଦେବା ପାଇଁ ଜିଲା ପ୍ରଶାସନ ପକ୍ଷରୁ ନିଷ୍ପତ୍ତି ହୋଇଛି । ଏ ନେଇ ମାଇକ ଯୋଗେ ପ୍ରଚାର କରିବା ପରେ ସ୍ଥାନୀୟ ଅଂଚଳରେ ପ୍ରତିକ୍ରିୟା ପ୍ରକାଶ ପାଇଛି । ବିଶେଷ କରି ଡୁବୁରୀ ଓ ବାରାଗଡିଆ ମୌଜାର ଅନେକ କ୍ଷତିଗ୍ରସ୍ତ ସରକାରଙ୍କ କ୍ଷତିପୂରଣ ରାଶି ଗ୍ରହଣ କରିନଥିବା ବେଳେ ପ୍ରଶାସନ ପକ୍ଷରୁ ଜୋର ଜବରଦସ୍ତ ଜମି ଅଧିଗ୍ରହଣ କରିବାକୁ ଉଦ୍ୟମ କରାଯାଉଛି ବୋଲି ସାମ୍ବାଦିକ ସମ୍ମିଳନୀରେ ଅଭିଯୋଗ କରାଯାଇଛି ।
ରାଜ୍ୟ ସରକାରଙ୍କ ପକ୍ଷରୁ ହେବାକୁ ଥିବା ଏହି ଜମି ଅଧିଗ୍ରହଣ ଫଳରେ କ୍ଷତିଗ୍ରସ୍ତ ହେବେ ବହୁ ଚାଷୀ ଓ ବ୍ୟବସାୟୀ । ସେଥିପାଇଁ ରାଜ୍ୟସରକାର କ୍ଷତିଗ୍ରସ୍ତଙ୍କୁ ଉପଯୁକ୍ତ କ୍ଷତିପୂରଣ ଦେବା ପାଇଁ ଦାବି କରାଯାଇଛି । ରାଜ୍ୟ ସରକାରଙ୍କ ପକ୍ଷରୁ ୨୦୧୩ ମସିହାର ଥଇଥାନ ଓ ପୁନଃର୍ବାସ ନିୟମ ଅନୁଯାୟୀ କ୍ଷତିପୁରଣ ଦେବା କଥା । କିନ୍ତୁ ଏହା ବଦଳରେ ୧୮୯୪ ମସିହା ବିସ୍ଥାପନ ଓ ଥଇଥାନ ଅନୁଯାୟୀ କ୍ଷତିଗ୍ରସ୍ତଙ୍କୁ କ୍ଷତିପୂରଣ ପ୍ରଦାନ କରାଯାଇଛି । ଯାହାର ବିରୋଧ କରି ସ୍ଥାନୀୟ ଅଞ୍ଚଳବାସୀ ଓ ବ୍ୟବସାୟୀ ଆନ୍ଦୋଳନ କରିବାକୁ ଚେତାବନୀ ଦେଇଛନ୍ତି ।
ଅନ୍ୟପଟେ ଜାତୀୟ ରାଜପଥ ନିର୍ମାଣ ପାଇଁ ଜମି ଅଧିଗ୍ରହଣ ପାଇଁ ସରକାରଙ୍କ ଧାର୍ଯ୍ୟ କ୍ଷତିପୂରଣ ପ୍ରଦାନ କରାଯାଇଛି ଓ ଯେଉଁମାନେ ଜମି ଅଧିଗ୍ରହଣ କାର୍ଯ୍ୟକୁ ବିରୋଧ କରିବେ, ସେମାନଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଅତିରିକ୍ତ ଜିଲାପାଳ ଅକ୍ଷୟ କୁମାର ମଲ୍ଲିକ କହିଛନ୍ତି । ୫୩ ନମ୍ବର ଜାତୀୟ ରାଜପଥ ସଂପ୍ରସାରଣ ପାଇଁ ଆବଶ୍ୟକ ଜମି ଅଧିଗ୍ରହଣରେ ଅର୍ଦ୍ଧାଧିକ ପରିବାର ପ୍ରଶାସନକୁ ସହଯୋଗ କରିଛନ୍ତି । ମାତ୍ର ଅଳ୍ପ କେତେ ଜଣ ସରକାରଙ୍କ ନୂତନ ଥଇଥାନ ପଲିସି ଅନୁଯାୟୀ କ୍ଷତିପୂରଣ ପ୍ରଦାନ ଦାବିରେ ପ୍ରଶାସନକୁ ବିରୋଧ କରୁଥିବା ଦେଖିବାକୁ ମିଳିଛି ।
ଯାଜପୁରରୁ ଜ୍ଞାନରଞ୍ଜନ ଓଝା, ଇଟିଭି ଭାରତ
