ଅବିଭକ୍ତ ଗଞ୍ଜାମ ଏବଂ କୋରାପୁଟ ଜିଲ୍ଲା ସମେତ ରାଜ୍ୟର କୋଣ ଅନୁକୋଣରେ ଥିବା କାମ୍ପ ସମ୍ପ୍ରଦାୟ ଦୀର୍ଘ ଦିନ ହେଲା ଓବିସି ମାନ୍ୟତା ପାଇଁ ଦାବି କରିଆସୁଛନ୍ତି । କିନ୍ତୁ, ଆଜିଯାଏଁ ତାଙ୍କ ଦାବି ପୂରଣ ହୋଇପାରି ନାହିଁ । ଅଧିକ ପଢନ୍ତୁ...
ଗଜପତି: ଅବିଭକ୍ତ ଗଞ୍ଜାମ ଏବଂ କୋରାପୁଟ ଜିଲ୍ଲା ସମେତ ରାଜ୍ୟର କୋଣ ଅନୁକୋଣରେ ଥିବା କାମ୍ପ ସମ୍ପ୍ରଦାୟ ଦୀର୍ଘ ଦିନ ହେଲା ଓବିସି ମାନ୍ୟତା ପାଇଁ ଦାବି କରିଆସୁଛନ୍ତି । କିନ୍ତୁ, ଆଜିଯାଏଁ ତାଙ୍କ ଦାବି ପୂରଣ ହୋଇପାରି ନାହିଁ । ତେବେ ବର୍ତମାନ ସଂସଦ ଓବିସି ମାନ୍ୟତା ପାଇଁ ରାଜ୍ୟ ସରକାରଙ୍କ ସୁପାରିସ୍ ଆବଶ୍ୟକ ବୋଲି ଘୋଷଣା କରିବା ପରେ ଏହି ଦାବି ନେଇ କାମ୍ପ ସମ୍ପ୍ରଦାୟର ଲୋକେ ରାଜ୍ୟ ସରକାରଙ୍କୁ ଭେଟିବା ସହ କେନ୍ଦ୍ରକୁ ଏଥିପାଇଁ ସୁପାରିସ କରିବାକୁ ଦାବି କରିବେ ।
ଏଥିପାଇଁ କାମ୍ପ ସମ୍ପ୍ରଦାୟର ଏକ ପ୍ରତିନିଧୀ ଦଳ ଶୁକ୍ରବାର ଭୁବନେଶ୍ବର ଯିବେ । ଏନେଇ ଗୁରୁବାର ସନ୍ଧ୍ୟାରେ ପାରଳାଖେମୁଣ୍ଡି ପୂର୍ତ୍ତ ଡାକ ବଙ୍ଗଳା ଠାରେ ଆୟୋଜିତ ଏକ ସାମ୍ବାଦିକ ସମ୍ମିଳନୀରେ ହାଇଟେକ୍ ମେଡିକାଲ କଲେଜର ଅଧ୍ୟକ୍ଷ ତଥା ବିଜେଡି ନେତା ଡ. ତିରୁପତି ପାଣିଗ୍ରାହୀ ସୂଚନା ଦେଇଛନ୍ତି ।
ଏହି ସମ୍ପ୍ରଦାୟର ଲୋକେ ଓଡିଶାରେ ଏସଇବିସି ମାନ୍ୟତା ପାଇଛନ୍ତି । କିନ୍ତୁ କେନ୍ଦ୍ର ସରକାର ଓବିସି ମାନ୍ୟତା ପ୍ରଦାନ କରୁନାହାନ୍ତି । ସେହିପରି ଆନ୍ଧ୍ରରେ ରହୁଥିବା ଏହି ସମ୍ପ୍ରଦାୟର ଲୋକଙ୍କୁ କେନ୍ଦ୍ର ଓବିସି ମାନ୍ୟତା ଦେଇଥିବା ବେଳେ ଓଡିଶାର କାମ୍ପ ମାନଙ୍କୁ ଏହା ନମିଳିବା ଅତ୍ୟନ୍ତ ଦୁର୍ଭାଗ୍ୟର ବିଷୟ ବୋଲି ସେ କହିଛନ୍ତି । ଏହି ସମ୍ପ୍ରଦାୟର ଲୋକଙ୍କ ମଧ୍ୟରୁ ଅଧିକାଂଶ ଚାଷ ଉପରେ ନିର୍ଭରଶୀଳ । ଏମାନଙ୍କ ପାଇଁ ଜଳସେଚନର ଯଥେଷ୍ଟ ଆବଶ୍ୟକତା ରହିଛି । ତେଣୁ, ଗଜପତି ଜିଲ୍ଲାରେ ଥିବା କୃଷ୍ଣ ସାଗର, ଗଜପତି ସାଗରର ପୁନଃଉଦ୍ଧାର ସହ ନିର୍ମାଣାଧୀନ ଡମ୍ବାପୁର ପ୍ରକଳ୍ପର କାର୍ଯ୍ୟଶେଷ କରିବା ପାଇଁ ମଧ୍ୟ ସରକାରଙ୍କ ନିକଟରେ ଦାବି କରାଯିବ ବୋଲି ସେ କହିଛନ୍ତି
ଗଜପତିରୁ ହରିହର ପଟ୍ଟନାୟକ, ଇଟିଭି ଭାରତ
