ପାରଳାଖେମୁଣ୍ଡି: ବଂଶଧାରା ନଦୀ ଉପରେ ଆନ୍ଧ୍ରର ନେରେଡି ପାଇଁ ଟ୍ରିବ୍ୟୁନାଲ ସବୁଜ ସଂକେତ ଦେବା ପରେ ଏଥିପାଇଁ ପଥ ପରିଷ୍କାର ହୋଇଛି । ଫଳରେ ଏହି ପ୍ରକଳ୍ପ ଦ୍ବାରା ଓଡ଼ିଶାର ବ୍ୟାପକ କ୍ଷତି ହେବା ନିଶ୍ଚିତ । ଗତକାଲି ରାଜ୍ୟ ବିଜେପି ପ୍ରତିନିଧି କ୍ଷତିଗ୍ରସ୍ତ ଅଞ୍ଚଳର ସ୍ଥିତି ଅନୁଧ୍ୟାନ କରିଛନ୍ତି । ଏନେଇ ରାଜ୍ୟ ବିଜେପି ଉପସଭାପତି ଭୃଗୁ ବକ୍ସିପାତ୍ର ପ୍ରତିକ୍ରିୟା ରଖିଛନ୍ତି ।
ଶୁକ୍ରବାର ବିଜେପିର ଏକ ପ୍ରତିନିଧି ଦଳ ବଂଶଧାରା ନଦୀରେ ନିର୍ମାଣ ହେବାକୁ ଥିବା ବ୍ୟାରେଜ କ୍ଷତିଗ୍ରସ୍ତ ଅଞ୍ଚଳକୁ ପରିଦର୍ଶନ କରି ଲୋକଙ୍କ ସହ ଆଲୋଚନା କରିଛି । ଆଜି ସାମ୍ବାଦିକ ସମ୍ମିଳନୀ କରି ରାଜ୍ୟ ସରକାରଙ୍କ ଅବହେଳାକୁ ନେଇ ବର୍ଷିଛି ବିଜେପି । ବଂଶଧାରା ନଦୀରେ ଆନ୍ଧ୍ରପ୍ରଦେଶ ବ୍ୟାରେଜ ନିର୍ମାଣ ପାଇଁ ଟ୍ରିବ୍ୟୁନାଲ ଦେଇଛନ୍ତି ରାୟ । କ୍ଷତିଗ୍ରସ୍ତ ଅଞ୍ଚଳବାସୀ ଆତଙ୍କିତ ଅବସ୍ଥାରେ ରହିଥିବା ବେଳେ ଏଯାଏଁ ସରକାର ସେମାନଙ୍କ ଦୁଃଖ ଶୁଣିନାହାଁନ୍ତି । ଏହାର ସମାଧାନ ଦିଗରେ ମଧ୍ୟ କୌଣସି ପଦକ୍ଷେପ ନେଉନାହାଁନ୍ତି । ଏ ସଂପର୍କରେ ରାଜ୍ୟ ସରକାର ନିଜର ମତ ମଧ୍ୟ ସ୍ପଷ୍ଟ ନକରିବା ଲୋକଙ୍କ ଦୁଃଖକୁ ଦ୍ବିଗୁଣିତ କରିଛି ବୋଲି ବିଜେପି ଦାବି କରିଛି । କହିବାକୁ ଗଲେ ଓଡିଶାକୁ ସୁରକ୍ଷା ଦେବାରେ ରାଜ୍ୟ ସରକାର ସଂପୂର୍ଣ୍ଣ ଭାବେ ବିଫଳ । ତେଣୁ ପଡୋଶୀ ରାଜ୍ୟମାନେ ଏହାର ଫାଇଦା ନେଉଛନ୍ତି । ଲୋକଙ୍କ ସମସ୍ୟା ବୁଝିବା ପାଇଁ ରାଜ୍ୟ ସରକାର ବିଫଳ। ତେଣୁ ତୁରନ୍ତ ରାଜ୍ୟ ସରକାର ବଂଶଧାରା ସଂପର୍କରେ ତୁରନ୍ତ ନିଜର ମତ ସ୍ପଷ୍ଟ କରିବା ସହ ଏହି ଅଞ୍ଚଳର ଲୋକଙ୍କ ସୁରକ୍ଷା ପାଇଁ ଟ୍ରିବୁନାଲ ରାୟ ବିରୁଦ୍ଧରେ ସୁପ୍ରମିକେର୍ଟରେ ରିଟପିଟିସନ ଦାୟର କରନ୍ତୁ ବୋଲି ବିଜେପି ରାଜ୍ୟ ଉପସଭାପତି ଭୃଗୁ ବକ୍ସିପାତ୍ର ଦାବି କରିଛନ୍ତି ।