ଭଦ୍ରକ: ପାଞ୍ଚଟି ପର୍ଯ୍ୟାୟରେ ସରିଛି ପଞ୍ଚାୟତ ନିର୍ବାଚନ । ମତଦାନ ସମୟରେ ଅନେକ ସ୍ଥାନରେ ଉତ୍ତେଜନା ଏବଂ ହିଂସାକାଣ୍ଡ ଘଟିଥିବାର ଦେଖାଯାଇଛି । ଯେଉଁ କାରଣରୁ ମତଦାନ ବାଧାପ୍ରାପ୍ତ ହୋଇଛି । ଏହି ପରିପ୍ରେକ୍ଷୀରେ ଅନେକ ସ୍ଥାନରେ ସାନି ନିର୍ବାଚନ ହେବାକୁ ରାଜ୍ୟ ନିର୍ବାଚନ ଆୟୋଗ ନିଷ୍ପତ୍ତି ନେଇଥିବାବେଳେ ଭଦ୍ରକ ଜିଲ୍ଲାର ୧୧ଟି ବୁଥର ମଧ୍ୟ ପୁନଃ ନିର୍ବାଚନ ହେବ ।
ଆଜି ଭଦ୍ରକର 11ଟି ବୁଥ୍ରେ ସାନି ମତଦାନ ଗତ 20 ତାରିଖ ପଞ୍ଚାୟତ ନିର୍ବାଚନ ବେଳେ ଭଦ୍ରକ ଜିଲ୍ଲା ତିହିଡି ବ୍ଲକର ୧୧ଟି ବୁଥ୍ରେ ନିର୍ବାଚନ ଆଇନ୍ ଉଲଙ୍ଘନ ହେବା ସହିତ ଉତ୍ତେଜନା ପ୍ରକାଶ ପାଇଥିଲା । ପରେ ତିହିଡି ବ୍ଲକର କୋହ୍ଲ, ଫତେପୁର ଓ ତଳଗୋପବିନ୍ଧା ପଞ୍ଚାୟତର ମୋଟ ୧୧ଟି ବୁଥ୍ରେ ଆଜି ସାନି ମତଦାନ ହେବ ବୋଲି ବିଜ୍ଞପ୍ତି ପ୍ରକାଶ ପାଇଛି । ଏନେଇ ଲୋକଙ୍କ ଭିତରେ ଭୋଟ ବିଭ୍ରାଟ ସମ୍ପର୍କିତ କଳ୍ପନା ଜଳ୍ପନାର ଅନ୍ତ ଘଟିଛି।
ଏଠାରେ ସୂଚନା ଯୋଗ୍ୟ ଯେ, କୋହ୍ଲ ପଞ୍ଚାୟତର 4 ଓ 5 ନମ୍ବର ବୁଥ୍ ବାଲାଟ ପେପର ଫୋଲ୍ଡିଂରେ ବିବାଦ ଓ ପ୍ରିଜାଡିଂ ଅଫିସରଙ୍କ ସମେତ ପୁଲିଂ ପାର୍ଟିକୁ ମାଡ ମାରି ଭୋଟ ବାକ୍ସ ଛଡାଇ ପୋଖରୀରେ ପିଙ୍ଗିବା ଭଳି ଘଟଣା ସମଗ୍ର ରାଜ୍ୟରେ ଚର୍ଚ୍ଚାର କେନ୍ଦ୍ରବିନ୍ଦୁ ସାଜିଥିଲା । ସେହିପରି ଫତେପୁର ପଞ୍ଚାୟତର ବଡଗାଲୋ ଗାଁର ୪ ନମ୍ବର ବୁଥ୍ରେ ଜନୈକା ମହିଳା ଏକାଧିକ ଭୋଟ ଦେଉଥିବାର ଖବର ପ୍ରଚାରିତ ହୋଇଥିଲା ।
ସେହି ପଞ୍ଚାୟତ ଅଧିନ ବାରିକବିନ୍ଧାର ୭ ଓ ୧୧ ନମ୍ବର ବୁଥ୍ରେ ବାଲାଟ ପେପର ଫୋଲ୍ଡିଂରେ ବିବାଦ ଓ ରିଗିଂ ହୋଇଥିଲା । ଏଣୁ ତଳଗୋପବିନ୍ଧା ପଞ୍ଚାୟତର ୧, ୨, ୩, ୫, ୧୦ ଓ ୧୩ ନମ୍ବର ବୁଥ ସମେତ ମୋଟ ୧୧ଟି ବୁଥ୍ରେ ସାନି ମତଦାନ ହେବ ବୋଲି ଜଣାଯାଇଛି । ନିର୍ବାଚନ କମିଶନରଙ୍କ ନିର୍ଦ୍ଦେଶ ମୁତାବକ ଜିଲ୍ଲା ପ୍ରଶାସନ ଏହିସବୁ ସ୍ଥାନରେ ଆସନ୍ତାକାଲି କଡା ସୁରକ୍ଷା ମଧ୍ୟରେ ସାନି ମତଦାନ କରାଇବାକୁ ନିଷ୍ପତ୍ତି ନେଇଥିବା ଜଣାଯାଇଛି ।
ନିର୍ବାଚନୀ ହିଂସାକୁ ନେଇ ବ୍ଲକ ପ୍ରଶାସନ ପକ୍ଷରୁ ବିଭିନ୍ନ ବୁଥ୍ର ଦୁର୍ବୃତ୍ତଙ୍କ ବିରୋଧରେ ୩ଟି ମାମଲା ରୁଜୁ ହୋଇଥିବା ବେଳେ ଜିଲ୍ଲା ପ୍ରଶାସନ ପକ୍ଷରୁ ସେମାନଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଜଣାପଡିଛି । ଗଣତାନ୍ତ୍ରିକ ଶାସନ ବ୍ୟବସ୍ଥାରେ ଅବାଧ ଓ ନିରପେକ୍ଷ ନିର୍ବାଚନ ପରିଚାଳନା କରାଇବା ଅପରିହାର୍ଯ୍ଯ । ଜନମତ ସାବ୍ୟସ୍ଥରେ ବିଶୃଙ୍ଖଳା ଓ ନିର୍ବାଚନ ପ୍ରକ୍ରିୟା ବ୍ୟତିକ୍ରମ ହେଲେ ଶାସକ ତଥା ପ୍ରଶାସନ ସ୍ଵଚ୍ଛତା ଓ କାର୍ଯ୍ୟ ଦକ୍ଷତା ଉପରେ ପ୍ରଶ୍ନବାଚୀ ସୃଷ୍ଟି ହୋଇଥାଏ । ତେଣୁ ନିର୍ବାଚନ ବେଳେ ଶୃଙ୍ଖଳା ରକ୍ଷା ଦିଗରେ ପ୍ରଶାସନ ସମ୍ପୂର୍ଣ୍ଣ ଅସମର୍ଥ ହୋଇଥିବା ଯୋଗୁଁ ପୁନର୍ବାର ତିହିଡି ବ୍ଲକର ୧୧ଟି ବୁଥ୍ରେ ସାନି ମତଦାନ ହେବ ବୋଲି କହିଲେ ବୋଧହୁଏ ଭୁଲ ହେବ ନାହିଁ।
ଭଦ୍ରକରୁ ଦେବାଶିଷ ମହାପାତ୍ର, ଇଟିଭି ଭାରତ
