ବରଗଡ: କ୍ୟାନସର, ଏହି ରୋଗର ନାଁ ଶୁଣିଲେ ଲୋକଙ୍କ ମନରେ ଛନକା ପଶିଯାଏ । ଅନେକ ଲୋକ ଏଥିରେ ଆକ୍ରାନ୍ତ ହୋଇ ଜୀବନ ହରାଇଥିବା ବେଳେ କେହି କେହି କର୍କଟକୁ ହରାଇ ଜୀବନକୁ ଜିତିଥାନ୍ତି । ଏପରି ସମସ୍ୟା ପାଇଁ କେବଳ ସାହସ ଓ ସଚେତନତା ଜରୁରୀ । କ୍ୟାନସର ଭୟର ପରାଜିତ ମନୋଭାବ ନରଖି ଏହାକୁ ହରାଇବା ପାଇଁ ମନୋବଳକୁ ଦୃଢ କରିବା ଦରକାର । ଏଥିପ୍ରତି ସଚେତନ ହେବା ଆବଶ୍ୟକ । ଏନେଇ ପ୍ରତିବର୍ଷ ନଭେମ୍ବର ୭କୁ ଜାତୀୟ କର୍କଟ ସଚେତନତା ଦିବସ ଭାବରେ ପାଳନ କରାଯାଏ । ଏନେଇ ବରଗଡରେ ଜାତୀୟ କ୍ୟାନସର ସଚେତନ ଦିବସ ପାଳିତ ହୋଇଯାଇଛି । ଜିଲ୍ଲାରେ କ୍ୟାନସର ରୋଗୀଙ୍କ ସଂଖ୍ୟା ବୃଦ୍ଧି ପାଇଥିବା ବେଳେ କ୍ୟାନସର ସରଭାଇଭର ମାନଙ୍କ ଦ୍ଵାରା ଗଠିତ ଫାଇଟର୍ସ ଗ୍ରୁପ ଦ୍ବାରା ଏହି ଦିବସ ପାଳିତ ହୋଇଛି ।
ସ୍ଥାନୀୟ ମିନି ଷ୍ଟେଡିୟମ ପରିସରରୁ ଏକ କ୍ୟାନସର ସଚେତନତା ରାଲି ବାହାରି ସହର ପରିକ୍ରମା କରିବା ସହ ସ୍ଥାନୀୟ ମହିଳା ମହାବିଦ୍ୟାଳୟରେ ଏକ ନାଟକ ବରଗଡ଼ ବିକାଶ ନର୍ସିଙ୍ଗ କଲେଜ ଛାତ୍ରୀ ମାନଙ୍କ ଦ୍ଵାରା ପରିବେଷଣ କରାଯାଇଥିଲା । ବିଶେଷ କରି ମହିଳା ମାନଙ୍କ ନିଟକରେ କ୍ୟାନସର ରୋଗ ଅଧିକ ମାତ୍ରାରେ ଦେଖାଦେଉଥିବାବେଳେ ସେମାନଙ୍କୁ ସଚେତନ କରାଯିବ ଉଦ୍ଦେଶ୍ୟରେ ଏହି ନାଟକର ଆୟୋଜନ କରାଯାଇଥିଲା । ଏହି ସଚେତନତା କାର୍ଯ୍ୟକ୍ରମରେ ବରଗଡର ବିଭିନ୍ନ ସମାଜସେବୀ ସଂଗଠନ ଯୋଗ ଦେଇଥିଲେ ।
ବିଶ୍ବରେ ଦ୍ବିତୀୟ ବଡ ରୋଗ ଭାବରେ ଉଭା ହୋଇଛି କ୍ୟାନସର । ସାଧାରଣ ଲୋକଠାରୁ ନେଇ ସେଲିବ୍ରିଟି ସମସ୍ତଙ୍କୁ କାବୁ କରିଛି କର୍କଟ । ପୂର୍ବରୁ ଏ ରୋଗ ସମ୍ପର୍କରେ କେହି ସଚେତନ ନଥିଲେ । ପ୍ରାରମ୍ଭିକ ପର୍ଯ୍ୟାୟରେ ରୋଗ ବିଷୟରେ ସଚେତନ ହେଲେ ଏହାର ପ୍ରତିକାର ସମ୍ଭବପର ହୋଇଥାଏ । କର୍କଟ ରୋଗକୁ ରୋକିବା ପାଇଁ ଉପାୟ ଏବଂ ପ୍ରାରମ୍ଭିକ ଲକ୍ଷଣ ବିଷୟରେ ସଚେତନତା ସୃଷ୍ଟି କରିବା ପାଇଁ ସୂଚନା ବୁକଲେଟ୍ ବାଣ୍ଟି ଏହି ଦିନ ପାଳନ କରାଯାଇଥାଏ । ରୋଗକୁ ହରାଇବାରକୁ ମେଡିସିନଠୁ ଅଧିକ କାମ ଦିଏ ମନୋବଳ ଓ ସଚେତନତା ।
୧୯୭୫ରେ ଭାରତରେ ଜାତୀୟ କର୍କଟ ନିୟନ୍ତ୍ରଣ କାର୍ଯ୍ୟକ୍ରମ ଆରମ୍ଭ ହୋଇଥିଲା । ୨୦୧୪ ସେପ୍ଟେମ୍ବରରେ ତତ୍କାଳୀନ କେନ୍ଦ୍ର ସ୍ବାସ୍ଥ୍ୟମନ୍ତ୍ରୀ ହର୍ଷବର୍ଦ୍ଧନଙ୍କ ଦ୍ବାରା ପ୍ରଥମେ ଜାତୀୟ କର୍କଟ ସଚେତନତା ଦିବସ ଘୋଷଣା କରାଯାଇଥିଲା । ଏହି ଦିନର ଲକ୍ଷ୍ୟ କର୍କଟ ଚିକିତ୍ସା ସୁବିଧା ଆରମ୍ଭ କରିବା । ୧୯୮୪-୮୫ରେ ଏହାର ଲକ୍ଷ୍ୟରେ ପରିବର୍ତ୍ତନ ଅଣାଯାଇଥିଲା । କର୍କଟ ରୋଗର ଶୀଘ୍ର ଚିହ୍ନଟ ଏବଂ ପ୍ରତିରୋଧ ଉପରେ ଗୁରୁତ୍ବ ଦିଆଯାଇଥିଲା ।
